الاياقتار قازاقستاندىقتارعا ءجيى قوڭىراۋ شالىپ، وزدەرىن كوممۋنالدىق قىزمەتكەرلەر رەتىندە تانىستىرادى. جىلۋ ەسەپتەگىشىن تىركەۋ، قۇجاتتاردى جاڭارتۋ، جەڭىلدىكتەر راسىمدەۋ نەمەسە بەرەشەكتى تەكسەرۋ سىلتاۋىمەن بانك شوتتارى مەن جەكە دەرەكتەرىنە قول جەتكىزۋگە تىرىسادى، دەپ حابارلايدى infohub.kz.
ءىىم مالىمەتىنشە، سويلەسۋ بارىسىندا الاياقتار ادامدى تەلەفونعا كەلگەن SMS كودىن ايتۋعا كوندىرەدى. ءدال وسى كود الاياقتارعا بانكتىك قوسىمشالارعا، مەملەكەتتىك سەرۆيستەردەگى اككاۋنتتارعا جانە باسقا دا جەكە دەرەكتەرگە كىرۋگە مۇمكىندىك بەرەدى.
«SMS كودىنىڭ كومەگىمەن الاياقتار بانكتىك قوسىمشاعا كىرۋگە؛ مەملەكەتتىك سەرۆيستەردەگى اككاۋنتتارعا قول جەتكىزۋگە؛ ءسىزدىڭ اتىڭىزدان زاڭسىز ارەكەتتەر جاساۋعا تىرىسۋى مۇمكىن»، – دەپ ەسكەرتتى ءىىم.
پوليسيا ناقتىلايدى: ناعىز كوممۋنالدىق قىزمەتكەرلەر ەشقاشان تەلەفون ارقىلى SMS كودتارىن، بانك كارتاسىنىڭ دەرەكتەمەلەرىن نەمەسە باسقا قۇپيا اقپاراتتى سۇرامايدى.
«ەگەر سىزگە وسىنداي قوڭىراۋ كەلسە، اڭگىمەنى بىردەن توقتاتقان دۇرىس. كۇمان تۋىنداعان جاعدايدا رەسمي ءنومىر بويىنشا ۇيىمنىڭ وزىنە حابارلاسۋ كەرەك. سونداي-اق بەيتانىس ادامداردىڭ نۇسقاۋى بويىنشا سىلتەمەلەرگە ءوتۋ نەمەسە قوسىمشالاردى ورناتۋ قاجەت ەمەس»، – دەپ اتاپ ءوتتى پوليسيا.
قۇقىق قورعاۋ ورگاندارى جاڭا سحەما تۋرالى تۋىستارعا، اسىرەسە تەلەفون الاياقتارىنىڭ قۇربانىنا ءجيى اينالاتىن ەگدە جاستاعى ادامدارعا ەسكەرتۋگە كەڭەس بەرەدى.
پوليسيا ەسكە سالادى: ءبىر عانا ايتىلعان SMS كودى قىلمىسكەرلەردىڭ ءسىزدىڭ شوتتارىڭىزعا قول جەتكىزىپ، اقشانى ۇرلاۋىنا جەتكىلىكتى بولۋى مۇمكىن.
جىل باسىنان بەرى پوليسەيلەر الدانعان قازاقستاندىقتارعا 4،8 ملرد تەڭگەنى قايتارۋعا قول جەتكىزدى.
بۇعان دەيىن «كۋرسيۆ» كريپتويندۋسترياداعى الاياقتاردىڭ honeypot («بال قۇمىراسى») سحەماسىن قولداناتىنىن، بۇل ينۆەستورلارعا توكەندى ەش قيىندىقسىز ساتىپ الۋعا مۇمكىندىك بەرەتىنىن، ءبىراق ونى ساتۋدى مۇمكىن ەتپەيتىنىن جازعان بولاتىن.