پاۆلودار وبلىسىندا اتا-اناسىنىڭ قامقورلىعىنسىز قالعان قىز مەملەكەتتىك تۇرعىن ءۇي قورىنان باسپانا الۋ قۇقىعىن سوت ارقىلى قالپىنا كەلتىردى، دەپ حابارلايدى infohub.kz سايتى.
جوعارعى سوتتىڭ رەسمي Telegram-ارناسىندا حابارلانعانداي، 2008 جىلى وبلىس تۇرعىنى بالالار ۇيىنە ورنالاستىرىلعان. الايدا ونى «جەتىم بالالار مەن اتا-اناسىنىڭ قامقورلىعىنسىز قالعان بالالار» ساناتى بويىنشا تۇرعىن ءۇي الۋ كەزەگىنە تەك 2014 جىلى قويعان.
2023 جىلى ۋاكىلەتتى ورگان قىزدى باسقا ەلدى مەكەنگە تۇراقتى تۇرۋعا كوشكەنىن العا تارتىپ، كەزەكتەن شىعارعان. سوتقا دەيىن ول 2008 جىلدان — بالالار ۇيىنە قابىلدانعان كەزدەن باستاپ ەسەپكە قويۋ قۇقىعىن قالپىنا كەلتىرۋدى تالاپ ەتكەن. بىرنەشە رەت ءوتىنىش بەرگەنىنە قاراماستان، ونى تەك العاشقى ەسەپكە قويىلعان كۇننەن — 2014 جىلدان باستاپ قانا كەزەككە قايتا قويعان.
بۇل شەشىممەن كەلىسپەگەن تالاپكەر 2008 جىلدان باستاپ تۇرعىن ءۇي الۋ ءۇشىن ەسەپكە قويۋ قۇقىعىن تانۋ تۋرالى تالاپپەن سوتقا جۇگىنگەن.
سوت انىقتاعانداي، قامقورشىلىق فۋنكسيالارىن جۇزەگە اسىرعان ورگاندار مەن ۇيىمدار ءوز مىندەتتەرىن تيىسىنشە ورىنداماعاندىقتان، تالاپكەر ۋاقتىلى كەزەككە قويىلماعان. كەشىكتىرىپ ەسەپكە قويۋ تالاپكەردىڭ كىناسىنەن بولماعان: كامەلەتكە تولماعاندىقتان، ول تۇرعىن ۇيگە دەگەن قۇقىعىن وزدىگىنەن جۇزەگە اسىرا الماعان. ول تاربيەلەنگەن بالالار ءۇيى قازىرگى ۋاقىتتا تاراتىلعان.
ۋاكىلەتتى ورگان تالاپكەردىڭ پاتروناتتىق تاربيەدە بولعانىن دالەلدەيتىن، ءىستىڭ ءمان-جايىن قۇقىقتىق باعالاۋعا اسەر ەتۋى مۇمكىن ەشقانداي دالەل ۇسىنباعان. «تۇرعىن ءۇي قاتىناستارى تۋرالى» زاڭعا سايكەس، تۇرعىن ۇيگە مۇقتاج دەپ تانىلىپ، ەسەپكە قويىلعان جەتىم بالالار مەن اتا-اناسىنىڭ قامقورلىعىنسىز قالعان بالالار باسپانا العانعا دەيىن ەسەپتەن شىعارىلۋعا جاتپايدى.
لاۋازىمدى تۇلعالاردىڭ زاڭسىز ارەكەتتەرى تالاپكەردىڭ كونستيتۋسيالىق قۇقىقتارى مەن زاڭدى مۇددەلەرىنىڭ بۇزىلۋىنا اكەپ سوققان. سوت مەملەكەتتىك ورگانداردىڭ ارەكەتسىزدىگىن دە، جەكەلەگەن لاۋازىمدى تۇلعالاردىڭ ارەكەتتەرىنىڭ زاڭسىزدىعىن دا انىقتاعاندىقتان، بالالار ۇيىنە قابىلدانعان كۇننەن باستاپ مەملەكەتتىك تۇرعىن ءۇي قورىنان باسپانا الۋ قۇقىعى قالپىنا كەلتىرىلدى. شەشىم زاڭدى كۇشىنە ەنگەن.