قازاقستان قۇراماسىنىڭ فۋتبولدان جاڭا باس جاتتىقتىرۋشىسى دجون ۆان ’ت شكيپ ۇلتتىق كومانداعا ويىنشىلاردى ىرىكتەۋ كريتەريلەرى مەن ۇلتتار ليگاسىنىڭ الداعى ويىندارىنا قويىلعان مىندەتتەر تۋرالى ايتىپ بەردى، دەپ حابارلايدى infohub.kz سايتى.
باپكەردىڭ ايتۋىنشا، ەڭ الدىمەن فۋتبولشى قۇرامادا ونەر كورسەتۋ ءۇشىن قاجەتتى قاسيەتتەرگە يە بولۋى كەرەك. «قۇراما ساپىندا كوپتەگەن ماچ وتكىزگەن ويىنشىلار بار، ءبىز ولاردى مۇقيات باقىلاۋدى جالعاستىرامىز. سونىمەن قاتار، ءوزىن كورسەتە الاتىن جانە ۇلتتىق كومانداعا ىلىگۋ مۇمكىندىگىنە يە بولا الاتىن باسقا فۋتبولشىلاردىڭ بار-جوعىن كورگىمىز كەلەدى. قۇرامانىڭ ەسىگى بارلىعىنا اشىق، كەز كەلگەن ويىنشى ءوز ويىنىمەن لايىق بولسا، مۇمكىندىك الا الادى»، — دەدى مامان.
تاعى ءبىر ماڭىزدى كريتەري رەتىندە ول فيزيكالىق دايىندىقتى اتادى. «بىزگە وتە قىسقا ۋاقىت ىشىندە ءتورت ماچ وتكىزۋ كەرەك، سوندىقتان ويىنشىلار الاڭدا تولىق 90 مينۋت ونەر كورسەتۋگە نەمەسە ماچتىڭ بەلگىلى ءبىر بولىگىن ساپالى ويناۋعا دايىن بولۋى ءتيىس. سونداي-اق قۇرام تەڭگەرىمى ماڭىزدى. ءبىز ءار پوزيسياعا ەكى فۋتبولشىدان بولعانىن قالايمىز»، — دەپ اتاپ ءوتتى ۆان ’ت شكيپ.
كوماندانىڭ باستى مىندەتى رەتىندە ول ۇلتتار ليگاسىندا ءساتتى ونەر كورسەتۋدى اتادى. «ءبىز ساپالى فۋتبول كورسەتىپ، ۇپاي جيناپ، مۇمكىندىگىنشە جوعارى ورىنعا جەتۋدى قالايمىز. ارينە، ءبىز ءارقاشان ماكسيمالدى ناتيجەگە ۇمتىلۋىمىز كەرەك، ال بۇل — ءبىرىنشى ورىن. ءدال وسى ماقساتتى الدىمىزعا قويۋىمىز كەرەك. وعان جەتە الاتىنىمىزدى ماچتار كورسەتەدى، ءبىراق ءبىز كوماندامىزدىڭ قاسيەتىنە جانە وسى ماقسات ءۇشىن كۇرەسە الاتىنىمىزعا سەنەمىز»، — دەپ تۇيىندەدى باپكەر.
ەسكە سالايىق، 7 تامىزدا قازاقستان فۋتبول فەدەراسياسى گوللانديالىق مامان دجون ۆان ’ت شكيپتى قۇرامانىڭ باس جاتتىقتىرۋشىسى قىزمەتىنە تاعايىنداۋ تۋرالى حابارلاعان بولاتىن. باپكەرلىك شتابقا سونداي-اق نۇربول جۇماسقالييەۆ (اسسيستەنت)، ەلدوس احمەتوۆ (اسسيستەنت)، يۋري نوۆيكوۆ (قاقپاشىلار باپكەرى)، ۆاديم بوروۆسكي (دەنە شىنىقتىرۋ باپكەرى) جانە تيمۋر قۇسايىنوۆ (اناليتيك) كىردى.