قازاقستان پرەمەر-مينيسترى ولجاس بەكتەنوۆ كولىك مينيسترلىگىنىڭ جاعداي ورتالىعىنا بارىپ، مەملەكەت باسشىسىنىڭ تاپسىرمالارىنىڭ ورىندالۋىمەن تانىستى، دەپ حابارلايدى infohub.kz سايتى.
قازىرگى ۋاقىتتا ۆەدومستۆو اۆتوموبيل، تەمىرجول جانە اۆياسيا سالالارىنا يننوۆاسيالىق سيفرلىق شەشىمدەردى بەلسەندى تۇردە ەنگىزۋدە. e-Joldar، Smart Cargo، Q-Gate، QazETA، Echelon Alpha جانە باسقا دا پلاتفورمالار قۇرىلدى.
«پرەزيدەنت قاسىم-جومارت توقايەۆ سيفرلىق قىزمەتتەر مەملەكەتىن ودان ءارى قۇرۋدىڭ باسىمدىعىن بەلگىلەدى. سيفرلاندىرۋ مەن جاساندى ينتەللەكت ازاماتتارعا، بيزنەسكە جانە مەملەكەتكە ناقتى پايدا اكەلۋى ءتيىس. ۇكىمەت الدىندا ەكونوميكانىڭ بارلىق سالاسىنا پايدالى جي شەشىمدەرىن ەنگىزۋ قارقىنىن جەدەلدەتۋ مىندەتى تۇر. بۇگىن ۇسىنىلعان كولىك سالاسىن تەحنولوگيالىق ترانسفورماسيالاۋ جوبالارىن ەلىمىزدىڭ بارلىق ايماعىندا قىسقا مەرزىمدە تولىق ەنگىزۋدى تاپسىرامىن»، – دەدى ق ر پرەمەر-مينيسترى ولجاس بەكتەنوۆ.
قازاقستان جول عىلىمي-زەرتتەۋ ينستيتۋتى (قازجولعزي) دا سالانى سيفرلاندىرۋعا بەلسەندى قاتىسۋدا. كەزدەسۋ بارىسىندا ينستيتۋت يننوۆاسيالىق جىلجىمالى زەرتحانانى تانىستىردى. ءموبيلدى كەشەندەردى ىسكە قوسۋ جوباسى بىلتىر جۇزەگە اسىرىلىپ، ەل ءۇشىن بىرەگەي بولدى.
«جول جەلىسىن زەرتتەۋ ءۇشىن ينستيتۋت 3 ارنايى جىلجىمالى جول زەرتحاناسىن پايدالانادى، ولار قوزعالىس بارىسىندا اۆتوموبيل جولدارىنىڭ جاي-كۇيى تۋرالى سيفرلىق دەرەكتەردى جيناۋعا جانە تالداۋعا مۇمكىندىك بەرەدى. زەرتحانالار بەينەكامەرالارمەن، ولشەۋىش داچيكتەرمەن، GPS/گلوناسس جۇيەلەرىمەن، جول توسەمىنىڭ اقاۋلارىن انىقتاۋدىڭ اۆتوماتتاندىرىلعان جۇيەسىمەن جانە بورتتىق ەسەپتەۋ كەشەندەرىمەن جابدىقتالعان. تەكسەرۋ بارىسىندا جول توسەمىنىڭ، بەلگىلەر مەن رازمەتكانىڭ، قورشاۋلار مەن جول جيەكتەرىنىڭ جاي-كۇيى، جولدىڭ گەومەتريالىق پارامەترلەرى جانە قوزعالىس قاۋىپسىزدىگىنە اسەر ەتەتىن باسقا دا فاكتورلار تىركەلەدى»، – دەدى «قازجولعزي» اق ۆيسە-پرەزيدەنتى كەنجەبەك ازاتبەكوۆ.
ءقازىردىڭ وزىندە ينستيتۋت وتاندىق وڭىرلەرگە جول توسەمىنىڭ ساپالى سيفرلىق ءاۋديتىن ۇسىنادى. ءقاۋىپتى ۋچاسكەلەردى انىقتاۋ جانە باسىم شارالاردى بەلگىلەۋ جۇمىستارى باتىس قازاقستان، ماڭعىستاۋ وبلىستارىندا جانە الماتى قالاسىندا جۇرگىزىلۋدە. اۋديتتەن كەيىن ماماندار نەگىزدەلگەن ۇسىنىستار جاسايدى، بۇل اقاۋلاردى جەكە-جەكە جويۋدان جول جەلىسىن جۇيەلى تۇردە جاڭارتۋعا كوشۋگە مۇمكىندىك بەرەدى.
قازجولعزي جول قوزعالىسى قاۋىپسىزدىگىنىڭ اۋديتىنە دە كوڭىل بولەدى. ينستيتۋت قىزمەتكەرلەرى چەحيادا وقۋدان ءوتىپ، العان داعدىلارىن قازاقستاندا قولدانۋدا. كولىك ۆيسە-مينيسترى ءدامىر قوجاحمەتوۆ ينستيتۋتتىڭ جاھاندىق ماقساتتارعا جەتۋدەگى ماڭىزدى ءرولىن اتاپ ءوتتى.
«قازجولعزي – بۇل ءبىزدىڭ عىلىمي بازامىز، وندا بارلىق زەرتحانالىق زەرتتەۋلەر جۇرگىزىلەدى. ينستيتۋت جول توسەمىنە قاتىستى جاڭا تەحنولوگيالارعا جاۋاپتى – سىزدەر بىلەسىزدەر، ءقازىر بەتوندى جانە پوليمەربەتوندى جابىندى قولدانۋ كوزدەلگەن. بارلىق ءتيىستى زەرتحانالىق زەرتتەۋلەردى ءدال قازجولعزي جۇرگىزەدى. بۇل ۇلەس باعا جەتپەس، ويتكەنى عىلىمسىز ودان ءارى دامۋ مۇمكىن ەمەس»، – دەپ اتاپ ءوتتى ق ر كولىك ۆيسە-مينيسترى.