الەمدىك جۇلدىز كانە ۋەستتىڭ الماتىداعى كونسەرتىنەن كەيىن ورتالىق ستاديوننىڭ فۋتبول الاڭىن قالپىنا كەلتىرۋ جۇمىستارى باستالدى. ماماندار گازون ساپاسىن قاناعاتتانارلىق دەپ باعالاپ، الاڭنىڭ جاي-كۇيى فۋتبولشىلار مەن جانكۇيەرلەردىڭ اسىعا كۇتكەن «قايرات» — «اندەرلەحت» حالىقارالىق ماچىن وتكىزۋگە مۇمكىندىك بەرەتىنىن ايتتى، دەپ حابارلايدى infohub.kz سايتى.
الماتى قالاسىنىڭ سپورت قۇرىلىستارى ديرەكسياسىندا اۆاريالىق جۇمىستار 16 تامىزدا كونسەرت ساحناسىن بولشەكتەگەننەن كەيىن بىردەن باستالعانىن اتاپ ءوتتى. ءتىرى قالعان شوپكە اەراسيا، تەسۋ جانە شابۋ جۇرگىزىلىپ، جاڭا تۇقىم سەبىلىپ، زاقىمدالعان جەرلەرگە قۇم سەبىلدى. سونداي-اق تامىر جۇيەسىن قالپىنا كەلتىرۋ ءۇشىن كۇندىز-تۇنى كۇشەيتىلگەن سۋارۋ ۇيىمداستىرىلدى.
گازوننىڭ جاي-كۇيى تۇراقتى باقىلاۋدا.
ەسكە سالايىق، 20 تامىزدا ەۋروپا ليگاسىنىڭ پلەي-وفف كەزەڭىنىڭ العاشقى ماچى «قايرات» — «اندەرلەحت» اراسىندا وتەدى. ويىن الماتىداعى ورتالىق ستاديوندا قازاقستان ۋاقىتىمەن 20:00-دە باستالادى. قارىمتا كەزدەسۋ 27 تامىزدا بريۋسسەلدە وتەدى.
بۇعان دەيىن بەلگيالىق كلۋبتىڭ شابۋىلشىسى لۋكاش امبروس ماچ الدىنداعى جاتتىعۋدان كەيىن الاڭ ساپاسى قولايلى ەكەنىن، دەگەنمەن «ءشوپتىڭ ساپاسى ونشا ەمەس شاعىن ايماقتار» كورىنەتىنىن راستاعان بولاتىن.
«قايراتتىڭ» باس باپكەرى رافاەل ۋرازباحتين ءشوپتىڭ توسەنىش استىنداعى جوعارى تەمپەراتۋرادان سارعايعانىن مويىندادى، ءبىراق كوماندا بۇل جاعدايدا ويناۋعا دايىن.
«كۋرسيۆ» جازعانداي، كانە ۋەستتىڭ كونسەرتى الماتىدا فورس-ماجورسىز ءوتتى. الايدا ءدال وسى كونسەرتكە بايلانىستى «قايرات» چەمپيوندار ليگاسىنىڭ ءۇشىنشى ىرىكتەۋ كەزەڭىندەگى بولگاريالىق «لەۆسكيگە» قارسى قارىمتا ماچىن تۇركىستانعا اۋىستىرۋعا ءماجبۇر بولدى، وندا قازاقستاندىق كوماندا جەڭىلىسكە ۇشىرادى.