الماتىنىڭ «قايرات» فۋتبول كلۋبى ەۋروكۋبوكتەردىڭ ءۇشىنشى ىرىكتەۋ كەزەڭىندەگى ىقتيمال ۇيدەگى ويىنىن ورتالىق ستاديوندا وتكىزە المايدى. كەزدەسۋ تۇركىستانعا اۋىستىرىلادى، سەبەبى 14 تامىزدا قالانىڭ باس ارەناسىندا امەريكاندىق رەپەر كانە ۋەستىڭ (Ye) كونسەرتى وتەدى، دەپ حابارلايدى infohub.kz سايتى.
كلۋب بۇل شەشىمدى رەسمي مالىمدەمەدە حابارلادى. «قايراتتا» كونسەرت كۇندەرى ەۋروكۋبوك ويىندارىنىڭ كەزەڭىنە سايكەس كەلەتىنىن، سوندىقتان ورتالىق ستاديون ويىنعا دايىندىق جۇرگىزۋ جانە وتكىزۋ ءۇشىن قولجەتىمسىز بولاتىنىن ءتۇسىندىردى. وسىعان بايلانىستى كلۋب كەزدەسۋدىڭ وتكىزىلۋ ورنىن وزگەرتۋدى سۇراپ، ۋەفا-عا جۇگىندى.
«قالىپتاسقان جاعداي مەن ەۋروكۋبوكتىك قارسىلاسۋلاردىڭ تىعىز كەستەسىن ەسكەرە وتىرىپ، كلۋب ءۇشىنشى ىرىكتەۋ كەزەڭىندەگى ىقتيمال ۇيدەگى ويىننىڭ وتكىزىلۋ ورنىن اۋىستىرۋدى سۇراپ، ۋەفا-عا جۇگىندى. وسى ءوتىنىشتى قاراۋ ناتيجەسىندە كەزدەسۋدى تۇركىستان قالاسىنداعى «تۇركىستان ارەنا» ستاديونىندا وتكىزۋ كەلىسىلدى»، – دەلىنگەن مالىمدەمەدە.
كلۋب ناقتى ويىن كۇنى مەن ۋاقىتى، سونداي-اق بيلەت ساتىلىمىنىڭ باستالۋى تۋرالى اقپارات كەيىنىرەك – كوماندانىڭ ەۋروكۋبوكتەگى كەلەسى قارسىلاسى انىقتالعاننان كەيىن بەلگىلى بولاتىنىن ايتتى. بۇعان دەيىن «قايرات» كونسەرتتىڭ بەلگىلەنگەن مەرزىمدە وتكىزىلۋىنە قارسى شىققان بولاتىن. كلۋب ءىس-شارانىڭ كۇنى ەۋروكۋبوكتە كۇرەسىن جالعاستىرىپ جاتقان جانە ۇيدەگى ويىندارىن ورتالىق ستاديوندا وتكىزەتىن كوماندامەن كەلىسىلمەگەنىن اتاپ ءوتتى.