Ye (كانە ۋەست) كونسەرتىنىڭ ۇيىمداستىرۋشىلارى كورەرمەندەردى الاڭعا كىرگىزبەيتىن تەحنيكا ءتىزىمىن جاريالادى. شەكتەۋلەر ءارتىس تالابى بويىنشا ەنگىزىلدى، دەپ حابارلايدى infohub.kz سايتى.
First Media Group كومپانياسى تىيىمنىڭ كاسىبي عانا ەمەس، اۋەسقوي فوتو جانە بەينە ءتۇسىرۋ جابدىقتارىنا دا قاتىستى ەكەنىن ناقتىلادى. ماسەلەن، كونسەرتكە فوتواپپاراتتار (Canon، Nikon، Sony، Fujifilm جانە ت.ب.)، كاسىبي بەينەكامەرالار، DJI Osmo Pocket جانە Osmo Action قالتا كامەرالارى، GoPro ەكشن-كامەرالارى جانە ولاردىڭ انالوگتارى، ستابيليزاتورلار (گيمبالدار)، اۋىستىرىلاتىن وبەكتيۆتەر، شتاتيۆتەر، مونوپودتار مەن سەلفي-تاياقشالار، دروندار، سونداي-اق كاسىبي ميكروفوندار مەن دىبىس جازۋ قۇرىلعىلارىن الىپ كىرۋگە بولمايدى.
Canon G7X نەمەسە DJI Osmo Pocket-كە تۇسىرۋگە داعدىلانعان ينفليۋەنسەرلەر مەن ەستەتيكالىق كادرلاردى ۇناتاتىندارعا سول كەشتە تەلەفونمەن شەكتەلۋگە تۋرا كەلەدى — بۇل قۇرىلعىلار تىيىم سالىنعاندار تىزىمىنە ەندى. ال پاۋەربانكتەر ەرەجەدە اتالماعاندىقتان، زارياد تۋرالى الاڭداماۋعا بولادى.
وزىڭىزبەن بىرگە سۋسىن مەن تاماق الماعانىڭىز ءجون. وتكەن جىلى دجەننيفەر لوپەستىڭ كونسەرتىندە ولاردى تريبۋناعا الىپ كىرۋگە قاتاڭ تىيىم سالىنعان بولاتىن، كورەرمەندەر ءۇشىن رەسمي فۋد-كورت جۇمىس ىستەدى.
بۇعان دەيىن كومپانيا كونسەرت الدىندا بيلەتتەرگە جەڭىلدىكتەر نەمەسە اكسيالار بولمايتىنىن مالىمدەگەن ەدى. FMG-دە حابارلاعانداي، الماتىعا 100 توننادان استام تەحنيكالىق جابدىق اكەلىنۋدە، ال شوۋ Ye الەمدىك تۋرىنىڭ باسقا كونسەرتتەرىندەگىدەي كەرەمەت بولادى.
ەسكە سالا كەتەيىك، ۋەستىڭ الماتىداعى العاشقى اۋقىمدى كونسەرتى 14 تامىزدا ورتالىق ستاديوندا وتەدى. بيلەتتەردى Freedom SuperApp قوسىمشاسىنان نەمەسە Ticketon.kz سايتىنان ساتىپ الۋعا بولادى. العاشقى ساتىلىم كۇنى-اق جانكۇيەرلەر ستاديونداعى ورىنداردىڭ جارتىسىن ساتىپ العان.