جۇكتىلىك كەزىندە انانىڭ جانە بالانىڭ العاشقى ەكى جىلدا قانت تۇتىنۋىن شەكتەۋ كەيىنگى جاستا السگەيمەر اۋرۋىنىڭ دامۋ ءقاۋپىن 46 پايىزعا تومەندەتۋى مۇمكىن. سوعىستان كەيىنگى ازىق-ت ۇلىك نورمالاۋ كەزەڭىندە تۋعان 60 مىڭنان استام بريتاندىقتىڭ دەرەگىن تالداعان زەرتتەۋشىلەر وسىنداي قورىتىندىعا كەلدى، دەپ حابارلايدى infohub.kz سايتى.

قازىرگى الەمدە قانت بارلىق جەردە بار، ءبىراق بۇل ءارقاشانداي بولماعان. ەكىنشى دۇنيەجۇزىلىك سوعىس كەزىندە جانە ودان كەيىنگى بىرنەشە جىلدا ۇلىبريتانيادا قانتقا قاتاڭ نورمالار قولدانىلدى. ەكى جاسقا دەيىنگى بالالار قانت پايىن الماعان.

1953 جىلى بۇل ساياساتتىڭ كۇشىن جويۋدان كەيىن ەرەسەكتەردىڭ قانت تۇتىنۋى ەكى ەسەگە جۋىق ءوستى، بۇل عالىمدارعا تابيعي باقىلاۋ توبىن بەردى، ويتكەنى نارەستەنىڭ راسيونىن ەكسپەريمەنت اياسىندا ادەيى شەكتەۋ ەتيكاعا جاتپايدى.

زەرتتەۋشىلەر 1951–1956 جىلدارى تۋعان، بريتاندىق بيوبانك — ءىرى مەديسينالىق دەرەكقورعا تىركەلگەن 60 مىڭنان استام ادامنىڭ مەديسينالىق جازبالارىن زەرتتەدى. قاتىسۋشىلار ءۇش توپقا ءبولىندى: ءبىرىنشىسى تۋعانعا دەيىن شەكتەۋلەرگە ۇشىرادى، ەكىنشىسى — تۋعانعا دەيىن جانە ەرتە بالالىق شاقتا، ءۇشىنشىسى (باقىلاۋ توبى) — ەشقانداي شەكتەۋسىز. سودان كەيىن ساراپشىلار ولاردىڭ مەديسينالىق كارتالارىن تالدادى.

ناتيجەلەر كورسەتكەندەي: باقىلاۋ توبىمەن سالىستىرعاندا، جۇكتىلىكتەن كەيىنگى العاشقى مىڭ كۇندە قانتتى شەكتەگەن ادامداردا كەز كەلگەن سەبەپتى دەمەنسيانىڭ دامۋ ءقاۋپى 27 پايىزعا تومەن بولدى. سونىمەن قاتار، ولاردا السگەيمەر اۋرۋىنىڭ ءقاۋپى 46 پايىزعا، مازاسىزدىقتىڭ — 20 پايىزعا، ال دەپرەسسيانىڭ — 11 پايىزعا تومەن بولدى. پاركينسون اۋرۋىمەن بايلانىس انىقتالمادى.

ءارى قاراي عالىمدار قانتتىڭ ميعا اسەرىن باعالاۋ ءۇشىن مرت سۋرەتتەرىن زەرتتەدى. گەنەتيكا مەن تۇقىم قۋالاۋشىلىقتى ەسكەرە وتىرىپ ستاتيستيكالىق تۇزەتۋدەن كەيىن، قانت تۇتىنۋدا شەكتەۋلەر بولعان ادامداردىڭ ميى ولاردىڭ كۇتىلەتىن جاسىنان شامامەن 0،39 جاسقا جاس كورىنگەنى انىقتالدى.

«بۇل كۆازيەكسپەريمەنتتىك ناتيجەلەر ەرتە جاستا قانت تۇتىنۋدى شەكتەۋدىڭ نەيروبيولوگيالىق قارتايۋدى باياۋلاتۋمەن جانە دەمەنسيا مەن پسيحيكالىق بۇزىلۋلاردىڭ دامۋ ءقاۋپىن تومەندەتۋمەن بايلانىستى ەكەنىن كورسەتەدى»، — دەپ جازدى ماقالا اۆتورلارى. اۆتورلار ءبىرجاقتى سەبەپ-سالدارلىق بايلانىستىڭ بار ەكەنىن راستامايدى جانە قازىرگى پوپۋلياسيالاردا قوسىمشا زەرتتەۋلەر جۇرگىزۋ قاجەتتىگىن اتاپ وتەدى.

بۇعان دەيىن «كۋرسيۆ» الماتى قالالىق جەدەل جاردەم اۋرۋحاناسىندا NEUROLITH اپپاراتىن قولدانا وتىرىپ، السگەيمەر اۋرۋىن ەمدەۋدىڭ يننوۆاسيالىق تەحنولوگياسى تانىستىرىلعانىن حابارلادى.