الماتىدا 14 تامىزدا كانە ۋەستتىڭ كونسەرتى وتەدى، بۇل مەتروپوليتەن جۇمىسىنا اسەر ەتەدى. شارا ورتالىق ستاديوندا وتەتىندىكتەن، مەترو كۇشەيتىلگەن رەجيمدە جۇمىس ىستەيدى، دەپ حابارلايدى infohub.kz سايتى.
الماتى مەتروپوليتەنىنىڭ Instagram-پاراقشاسىندا جاريالانعان اقپاراتقا سايكەس، 14 تامىزدا پويىزداردىڭ قوزعالىس ارالىقتارى تۇزەتىلەدى. اتاپ ايتقاندا، 06:20-دان 09:00-گە دەيىن جانە 17:00-دەن 20:00-گە دەيىن جەلىدە 11 قۇرام 5 مينۋت 38 سەكۋند ارالىقپەن جۇرەدى. كۇندىز 09:00-دەن 17:00-گە دەيىن جانە كەشكە 20:00-دەن ءتۇن ورتاسىنا دەيىن ارالىق 10 مينۋت 20 سەكۋندقا ۇزارادى، بۇل كەزدە جەلىدە 6 پويىز بولادى. تۇندە، 00:00-دەن 03:00-گە دەيىن، 4 پويىز 15 مينۋت 30 سەكۋند ارالىقپەن جۇمىس ىستەيدى.
مەترونىڭ بارلىق ستانسيالارى 03:00-گە دەيىن اشىق بولادى، تەك «بايقوڭىر» ستانسياسى 21:00-دەن باستاپ جولاۋشىلاردى كىرگىزۋ جانە شىعارۋ ءۇشىن جابىلادى. پويىزدار بۇل ستانسياعا توقتاماي وتەدى.
جولاۋشىلارعا مەتروعا كىرەر كەزدە باقىلاۋ كۇشەيتىلەتىنى دە ەسكەرتىلدى.
بۇعان دەيىن الاياقتاردىڭ كونسەرتكە جوق بيلەتتەردى ينتەرنەتتە ساتىپ جاتقانى حابارلانعان بولاتىن. پوليسيا جانكۇيەرلەرگە بيلەت ساتىپ الۋ كەزىندە الدانىپ قالماۋ جونىندە ۇسىنىستار بەردى. سونىمەن قاتار، الماتى اكىمدىگى 14 تامىزدا كەيبىر كوشەلەردىڭ جابىلاتىنىن جانە 32 اۆتوبۋس باعىتىنىڭ قوزعالىس سحەماسى وزگەرەتىنىن مالىمدەدى.