قاپشاعاي سۋ قويماسىندا قايعىلى وقيعا بولدى: قونايەۆ قالاسىنىڭ تۇرعىنى اندرەي فيليپوۆيچ كوزياتينسكي دەمالۋشىنى قۇتقارۋعا تىرىسىپ، قازا تاپتى، دەپ حابارلايدى infohub.kz سايتى.
قونايەۆ قالاسىنىڭ اكىمى اسحات بەردىحانوۆ Instagram-داعى پاراقشاسىندا وقيعا تۋرالى حابارلادى. «قاپشاعاي سۋ قويماسىندا باسقا ادامنىڭ ءومىرىن ساقتاپ قالۋ ءۇشىن ءوز ءومىرىن قيعان قونايەۆ قالاسىنىڭ تۇرعىنى اندرەي فيليپوۆيچ كوزياتينسكيدىڭ قازاسى تۋرالى حاباردى تەرەڭ قايعىمەن قابىلدادىم. بۇل ەرلىك – ناعىز باتىلدىق، جانقيارلىق جانە ادامگەرشىلىك بيىكتىگىنىڭ ۇلگىسى»، – دەپ جازدى اكىم.
بەردىحانوۆتىڭ ايتۋىنشا، اندرەي ءوز قاۋىپسىزدىگى تۋرالى ويلانباستان، قيىن جاعدايعا تاپ بولعان ادامعا كومەككە ۇمتىلعان. «مۇنداي تاڭداۋدى تەك ۇلكەن جۇرەك پەن مىقتى مىنەزدى ادام عانا جاساي الادى. قونايەۆ قالاسىنىڭ تۇرعىندارى اتىنان اندرەيدىڭ اكەسىنە، اعاسىنا، تۋعان-تۋىستارىنا جانە جاقىندارىنا، ونى تانيتىن جانە جاقسى كورەتىندەردىڭ بارىنە شىن جۇرەكتەن كوڭىل ايتامىن. وزدەرى ءۇشىن بۇل شىعىن ورنى تولماس قاسىرەت بولعان وتباسىنا ەرەكشە قولداۋ بىلدىرەمىن»، – دەپ تۇيىندەدى اكىم.