استرونومدار سيرەك كەزدەسەتىن عارىشتىق قۇبىلىسقا كۋا بولدى: قارا قۇردىڭ الىپ جۇلدىزدى جۇتىپ قويۋى بەلگىلى سۆەرحنوۆايالاردان اسىپ تۇسەتىن قۋاتتى ەنەرگيا تولقىنىن تۋدىردى. سونىمەن قاتار، جۇلدىز يادروسىنىڭ ءبىر بولىگى جويقىن جارىلىستان كەيىن ساقتالىپ قالدى، دەپ حابارلايدى infohub.kz سايتى.
AT2024wpp دەپ اتالىپ، «ۋيپپەت» دەگەن اتقا يە بولعان بۇل وقيعانى ليۆەرپۋل ۋنيۆەرسيتەتىنىڭ دجون مۋرس اتىنداعى استرونومدارى تىركەدى. قارا قۇردىڭ الىپ جۇلدىزدى جۇتىپ قويۋى باقىلاۋ تاريحىنداعى ەڭ قۋاتتى ەنەرگيا تولقىندارىنىڭ ءبىرىن تۋدىردى. قىسقا ۋاقىت ىشىندە كۇننەن 400 ميلليارد ەسە ارتىق ەنەرگيا ءبولىنىپ شىقتى، ال سوققى تولقىنى جارىق جىلدامدىعىنىڭ بەستەن ءبىر بولىگىندەي جىلدامدىقپەن قوزعالدى.
ليۆەرپۋل تەلەسكوپى مەن ناسا-نىڭ Swift سپۋتنيگى ارقىلى جۇرگىزىلگەن باقىلاۋلار بۇل نىساننىڭ سيرەك كەزدەسەتىن وپتيكالىق ترانزيەنتتەرگە جاتاتىنىن راستادى. جويىلعان جۇلدىزدىڭ ماتەرياسى قارا قۇردىڭ اينالاسىندا قاتتى قىزعان ديسك قۇرىپ، قارقىندى رەنتگەن ساۋلەلەنۋىن تۋدىردى.
جارىلىستان التى اي وتكەن سوڭ Keck جانە VLT تەلەسكوپتارى سۋتەگى مەن گەليدىڭ انومالدى ىزدەرىن انىقتادى. گاز اعىنى سەكۋندىنا 6000 كيلومەتردەن استام جىلدامدىقپەن قوزعالادى. بۇل جويىلعان جۇلدىز يادروسىنىڭ تىعىز قۇرىلىمى ساقتالىپ، عارىشتا قوزعالىسىن جالعاستىرىپ جاتقانىن كورسەتەدى.