قاراعاندىدا 78 جاستاعى زەينەتكەر الاياقتاردىڭ قۇربانى بولدى. ولار وزدەرىن «قارعىس الىپ تاستاۋشى» رەتىندە تانىستىرىپ، ايەلدىڭ التىن بۇيىمدارى مەن 15 ملن تەڭگەسىن الىپ كەتكەن. بۇل تۋرالى infohub.kz سايتى حابارلايدى.
وقيعا كوشەدە بولعان. قارت ايەلگە ءۇش بەيتانىس ايەل جاقىنداپ، ءتىس ەمحاناسىنا باراتىن جولدى سۇراعان. اڭگىمە بارىسىندا ولاردىڭ ءبىرى زەينەتكەرگە جاقىن ادامى تاراپىنان ەسكى قارعىس سالىنعانىن، ونى الىپ تاستاۋدىڭ جالعىز جولى — جاقىن ادامىنىڭ ءولىمىن بولدىرماۋ ەكەنىن ايتقان. الاياقتار ايەلدى «تازارتاتىن» ينە ساتىپ الۋعا، شيكى جۇمىرتقا اكەلۋگە، سودان كەيىن التىن بۇيىمدارى مەن اقشاسىن گازەتكە وراۋعا كوندىرگەن. ولار «جاماندىقتان» تولىق قۇتىلۋعا ۋادە بەرىپ، ورالعان بۋمانى ۇستاتىپ، ونى 40 كۇننەن كەيىن عانا اشۋ كەرەكتىگىن ەسكەرتكەن.
زەينەتكەر بارلىق نۇسقاۋدى ورىنداعان، ءبىراق تۇندە بۋمانى اشىپ كورۋگە بەل بۋعان. ىشىندە التىن مەن اقشانىڭ ورنىنا جاي عانا قاعاز بولىپ شىققان. جالپى شىعىن 15 ملن تەڭگەنى قۇراعان.
پوليسيا قىزمەتكەرلەرى جابىرلەنۋشىنىڭ سيپاتتاماسى بويىنشا كۇدىكتىلەردىڭ تۇلعاسىن انىقتاعان. ولار پاۆلودار، الماتى جانە جەتىسۋ وبلىسىنىڭ تۇرعىندارى بولىپ شىققان. ايەلدەر تەميرتاۋدا ۇستالىپ، زەينەتكەر ولاردى پوليسيا بولىمىندە تانىعان. ءقازىر ولار ۋاقىتشا ۇستاۋ يزولياتورىندا وتىر، تەرگەۋ جالعاسۋدا. قۇقىق قورعاۋ ورگاندارى ولاردىڭ وسىعان ۇقساس قىلمىستارعا قاتىسى بار-جوعىن تەكسەرىپ جاتىر.