قاراعاندى وبلىسىندا تابيعي ءورت سالدارىنان ادامدار زارداپ شەكتى. ۋاكىلەتتى ورگاندار جاعدايدى باقىلاۋدا ۇستاپ وتىر، دەپ حابارلايدى infohub.kz.
اكىمدىكتىڭ رەسمي سايتىندا حابارلانعانداي، قارقارالى اۋدانىنىڭ جاڭاتۇعان اۋىلى ماڭىندا اۋە-ۆيزۋالدى تەكسەرۋ جۇرگىزىلدى. جاڭا ءورت وشاقتارى انىقتالعان جوق، ەلدى مەكەندەرگە ءقاۋىپ ءتونىپ تۇرعان جوق. تجد-دا ءىس-قيمىلدى ۇيلەستىرۋ ءۇشىن جەدەل شتاب جۇمىس ىستەپ جاتىر.
قاراعاندى وبلىسىنىڭ اكىمى ەرماعانبەت بولەكپايەۆ اپپاراتتىق كەڭەستە تجد باستىعى مەن اۋدان اكىمدەرىنىڭ ەسەپتەرىن تىڭدادى.
«دالا ءورتى شەت، اقتوعاي، بۇقار جىراۋ جانە قارقارالى اۋداندارىندا تىركەلدى. ءورتتى وقشاۋلاۋ جانە جويۋ، ەلدى مەكەندەردى قورعاۋ ءۇشىن تجم مەن جەرگىلىكتى اتقارۋشى ورگانداردىڭ كۇشى مەن قۇرالدارى جۇمىلدىرىلدى. 620 جەكە قۇرام مەن 134 تەحنيكا بىرلىگى جىبەرىلدى. جاعدايعا تۇراقتى مونيتورينگ جۇرگىزىلۋدە»، – دەدى تجد باستىعى مارعۇلان امانبايەۆ.
ونىڭ ايتۋىنشا، جاعدايدى قاتتى جەل قيىنداتىپ وتىر.
قارقارالى اۋدانىندا ەكى زارداپ شەككەن ادام بار – 1989 جانە 1970 جىلدارى تۋعان ەر ادامدار. ولار مەديسينالىق كومەككە جۇگىندى. بىرەۋىندە 10%، ەكىنشىسىندە 20% كۇيىك بار. ءقازىر ەكەۋى دە اۋرۋحانادا. جاعدايلارى تۇراقتى.
قارقارالى اۋدانىنىڭ اكىمى سايات ءمۇسىننىڭ مالىمەتىنشە، جاڭاتۇعان اۋىلى ماڭىندا ورتكە قارسى شارالاردى ەكى توپ جۇرگىزىپ جاتىر. 159 جەكە قۇرام مەن 52 تەحنيكا بىرلىگى جۇمىلدىرىلعان. ول سونداي-اق بەسوبا اۋىلى ماڭىنداعى قىستاقتاردا ءۇش ءورتتىڭ سوندىرىلگەنىن حابارلادى.
اقتوعاي جانە شەت اۋداندارىندا جاعداي تۇراقتى، باقىلاۋدا. تابيعي ورتتەر جويىلدى.
«ىستىق اۋا رايى مەن قاتتى جەلگە بايلانىستى دالا ءورتىنىڭ ءقاۋپى ساقتالىپ وتىر. باقىلاۋ تۇراقتى بولۋى كەرەك، جەرگىلىكتى اكىمدىكتەر تجد-مەن تىعىز بايلانىستا جۇمىس ىستەۋى قاجەت»، – دەپ اتاپ ءوتتى ەرماعانبەت بولەكپايەۆ.
ەسكە سالايىق، بۇعان دەيىن قاراعاندى وبلىسىنىڭ قارقارالى اۋدانىندا قۇتقارۋشىلاردىڭ قۇرعاق وسىمدىكتەردىڭ ءورتىن تاۋلىك بويى ءسوندىرىپ جاتقانى حابارلانعان بولاتىن.