قاراعاندى وبلىسىندا ءبىر توپ ادام ءۇي جانۋارلارىن ۇرلاۋعا كۇدىكتى رەتىندە ۇستالدى. بارلىق كۇدىكتىلەر كىناسىن مويىنداپ، ىستەگەن ىسىنە وكىنەتىنىن ءبىلدىردى، دەپ حابارلايدى infohub.kz سايتى.
ءىىم مەدياپورتالىنىڭ مالىمەتىنشە، نۇرا اۋدانىندا كريمينالدىق پوليسيا قىزمەتكەرلەرى جەرگىلىكتى تۇرعىنداردىڭ مالىن جۇيەلى تۇردە ۇرلاۋعا كۇدىكتى ءبىر توپ ەر ادامدى ۇستادى. تەرگەۋ نۇسقاسى بويىنشا، كۇدىكتىلەر ناۋرىز ايىنان باستاپ ءوز اۋدانىنداعى تۇرعىنداردىڭ مالدارىن تۇراقتى تۇردە ۇرلاعان.
بىرنەشە اي ىشىندە كۇدىكتىلەر كەمىندە بەس رەت مال ۇرلىعىن جاساعان. ولاردىڭ ولجاسى 14 سيىر مەن 24 قوي بولدى. اۋىل تۇرعىندارى ءۇشىن بۇل جاي عانا م ۇلىك ەمەس، نەگىزگى تابىس كوزى جانە ايلار بويى ەڭبەكتىڭ ناتيجەسى.
جەدەل-ىزدەستىرۋ ءىس-شارالارى بارىسىندا نۇرا اۋدانىنىڭ كريمينالدىق پوليسيا قىزمەتكەرلەرى كۇدىكتىلەردىڭ ىزىنە ءتۇستى. بارلىق كۇدىكتىلەر ۇستالدى. ولار نۇرا اۋدانىنداعى اۋىلداردىڭ ءبىرىنىڭ تۇرعىندارى بولىپ شىقتى.
تەرگەۋ ارەكەتتەرى كەزىندە ۇستالعاندار كىناسىن تولىق مويىنداپ، ىستەگەن ىسىنە وكىندى. پوليسەيلەر يەلەرىنە ۇرلانعان مالدىڭ ءبىر بولىگىن — 7 سيىر مەن 3 قويدى قايتارۋعا ۇلگەردى. قالعان مال، تەرگەۋ انىقتاعانداي، اقمولا وبلىسى مەن استانا اۋماعىندا ساتىلعان. قازىرگى ۋاقىتتا ونى تاۋىپ، زاڭدى يەلەرىنە قايتارۋ شارالارى قابىلدانۋدا.
وسى فاكتى بويىنشا سوتقا دەيىنگى تەرگەۋ جالعاسۋدا. سونىمەن قاتار، جەدەل قىزمەتكەرلەر ۇستالعانداردىڭ نۇرا اۋدانىندا دا، كورشىلەس وڭىرلەردە دە جاسالعان باسقا دا وسىعان ۇقساس قىلمىستارعا قاتىسىن تەكسەرۋدە.