قاراعاندى وبلىسىنىڭ شەت اۋدانىندا ۋنيرەك اۋىلىنىڭ ماڭىندا بولعان ءىرى تابيعي ءورت وقشاۋلاندى. وتپەن كۇرەس تجم اۆياسياسىنىڭ كومەگىمەن جۇرگىزىلدى، دەپ حابارلايدى infohub.kz سايتى.
ءورت قاراعاندى ورمان شارۋاشىلىعى مەن جانۋارلار دۇنيەسىن قورعاۋ اۋماعىن شارپىدى. جالپى ءورت اۋدانى 650 گەكتارعا جەتتى، ونىڭ 613،6 گەكتارى قۇرعاق شوپكە تيەسىلى.
ۆەدومستۆونىڭ مالىمەتىنشە، جالىننىڭ ورمان القاپتارىنا تارالۋ ءقاۋپىنىڭ الدىن الۋ مۇمكىن بولدى. ءورتتى سوندىرۋگە تاۋلى-شوقىلى جەر بەدەرى مەن قول جەتپەيتىن ۋچاسكەلەر، سونداي-اق قاتتى جەل كەدەرگى كەلتىردى، الايدا وتتىڭ تارالۋى توقتاتىلدى.
كۇردەلى جەرلەردەگى جەكەلەگەن وشاقتارمەن كۇرەسۋ ءۇشىن اۆياسيا جۇمىلدىرىلدى. «قازاۆياقۇتقارۋ» تىكۇشاقتارى ارنايى سۋ قۇيۋ قۇرىلعىلارىن پايدالانىپ، جالپى كولەمى 78 توننا سۋدى 26 رەت توكتى.
ءورتتى جويۋعا 310-عا جۋىق ادام مەن 44 تەحنيكا جۇمىلدىرىلدى. وپەراسياعا تجم، جەرگىلىكتى اتقارۋشى ورگاندار، ورمان شارۋاشىلىقتارى جانە باسقا دا قىزمەتتەردىڭ قىزمەتكەرلەرى، سونداي-اق «قازاۆياقۇتقارۋدىڭ» ەكى تىكۇشاعى قاتىستى.
قازىرگى ۋاقىتتا ماماندار اۋماقتى سۋارۋدى جانە جەكەلەگەن تۇتىندەۋ وشاقتارىن جويۋدى جالعاستىرۋدا. احۋال تجم باقىلاۋىندا.
بۇعان دەيىن قاراعاندى وبلىسىنداعى تابيعي ورتتەردەن زارداپ شەككەندەر تۋرالى حابارلانعان بولاتىن. سونىمەن قاتار، قارقارالى اۋدانىندا قۇتقارۋشىلار قۇرعاق وسىمدىكتەردىڭ ءورتىن تاۋلىك بويى سوندىرۋدە.