قازاقستان ۆيسە-پرەزيدەنتى ەرلان كارين «تازا قازاقستان» باستاماسىن دامىتۋدىڭ جاڭا قۇرالدارىن ازىرلەۋدى ۇسىندى. ولاردىڭ قاتارىندا ءبىرىڭعاي سيفرلىق پلاتفورما قۇرۋ، تازالىقتىڭ ۇلتتىق ستاندارتىن ەنگىزۋ، وڭىرلەر رەيتينگىن جاساۋ جانە ەلدى كوگالداندىرۋدىڭ ونلاين-كارتاسىن ازىرلەۋ بار. بۇل ماسەلەلەر يدەولوگيالىق كەڭەستىڭ وتىرىسىندا تالقىلاندى، دەپ حابارلادى اقوردا، infohub.kz سايتىنا سىلتەمە جاساپ.
وتىرىسقا پرەزيدەنت اكىمشىلىگى قۇرىلىمدىق بولىمشەلەرىنىڭ جانە بەيىندى ورتالىق مەملەكەتتىك ورگانداردىڭ باسشىلارى قاتىستى.
ءبىر بلوك كونستيتۋسيالىق قۇندىلىقتاردى جۇيەلى ىلگەرىلەتۋگە ارنالدى. كارين كونستيتۋسيادا بەكىتىلگەن قاعيداتتار پرەزيدەنتتىڭ ستراتەگيالىق رەفورمالار باعىتىنىڭ نەگىزىن قۇرايتىنىن اتاپ ءوتتى.
ونىڭ ايتۋىنشا، مەملەكەتتىك ساياسات زاڭ مەن ءتارتىپتىڭ ۇستەمدىگىن قامتاماسىز ەتۋگە، جالپىۇلتتىق بىرلىكتى، ەتنوسارالىق جانە كونفەسسياارالىق كەلىسىمدى نىعايتۋعا، مادەنيەت، ءبىلىم، عىلىم مەن يننوۆاسيالاردى دامىتۋعا، قورشاعان ورتانى قورعاۋعا، سونداي-اق ەڭبەككە قۇرمەت، الەۋمەتتىك وپتيميزم جانە جاۋاپتى ءپاتريوتيزمدى ىلگەرىلەتۋگە باعىتتالۋى ءتيىس.
وسى باعىتتاعى مەملەكەتتىك اپپارات جۇمىسىنىڭ نەگىزگى قۇجاتتارى رەتىندە كارين «قازاقستان رەسپۋبليكاسىنىڭ ىشكى ساياساتىنىڭ نەگىزگى قاعيداتتارى، قۇندىلىقتارى مەن باعىتتارىن بەكىتۋ تۋرالى» پرەزيدەنت جارلىعىن جانە كونستيتۋسيانى ىلگەرىلەتۋ جونىندەگى ءىس-شارالار جوسپارىن اتادى.
وتىرىسقا قاتىسۋشىلار جاڭا قوعامدىق ەتيكانى قالىپتاستىرۋدى بولەك قاراستىردى. ۆيسە-پرەزيدەنت بوتەن قۇندىلىقتار مەن مىنەز-ق ۇلىق نورمالارىن تاڭۋدىڭ، قوعامدىق ءومىردى ارحايزاسيالاۋدىڭ جانە تاريحتى ميفولوگيالاندىرۋدىڭ ارەكەتتەرىنە قارسى تۇرۋ قاجەتتىگىن مالىمدەدى.
وسىعان بايلانىستى ول «زاڭ جانە ءتارتىپ» قاعيداتىن، «تازا قازاقستان» جوباسىن جانە «ادال ازامات» تاربيە باعدارلاماسىن دايەكتى تۇردە ىسكە اسىرۋدىڭ ماڭىزدىلىعىن اتاپ ءوتتى. «تازا قازاقستاندى» ودان ءارى دامىتۋ ءۇشىن ءبىرىڭعاي سيفرلىق پلاتفورما قۇرۋ، وڭىرلەر رەيتينگىن قالىپتاستىرۋ، تازالىقتىڭ ۇلتتىق ستاندارتىن ەنگىزۋ جانە قازاقستاندى كوگالداندىرۋدىڭ ونلاين-كارتاسىن ازىرلەۋ ۇسىنىلدى.
تاعى ءبىر بلوك ىشكى ساياسات سالاسىنداعى ستراتەگيالىق قۇجاتتاردى ىسكە اسىرۋعا قاتىستى بولدى. ولاردىڭ قاتارىندا «قازاقستان بالالارى» تۇجىرىمداماسى، ءدىني سالاداعى مەملەكەتتىك ساياساتتى دامىتۋ تۇجىرىمداماسى، مەملەكەتتىك جاستار ساياساتى تۇجىرىمداماسى جانە جاستاردى اسكەري-پاتريوتتىق تاربيەلەۋ تۇجىرىمداماسى بار.
كارين سونداي-اق «وقىرمان ۇلت» تۇجىرىمداماسىن جانە ەتنوسارالىق قاتىناستار مەن قوعامدىق كەلىسىمدى دامىتۋدىڭ جاڭا تۇجىرىمداماسىن ۋاقتىلى ازىرلەۋ قاجەتتىگىنە نازار اۋداردى.
ۆيسە-پرەزيدەنت جالپىۇلتتىق جوبالار مەن باستامالار ەلدى جاڭعىرتۋدىڭ جالپى باعىتىنا كىرىكتىرىلۋى ءتيىس ەكەنىن اتاپ ءوتتى.
«ىشكى ساياسات سالاسىنداعى جۇيەلەۋدى جالعاستىرۋ قاجەت – ءبىرىڭعاي تالاپتاردى، ناقتى رەگلامەنتتەر مەن راسىمدەردى بەكىتۋ كەرەك. قارقىندى باسەڭدەتۋگە نەمەسە قول جەتكىزگەن جەتىستىكتەرمەن توقتاپ قالۋعا بولمايدى، ۇنەمى العا ءجۇرۋ كەرەك. ءبىزدىڭ ورتاق مىندەتىمىز – ازاماتتاردىڭ سۇرانىستارىنا ءتيىمدى جاۋاپ بەرۋ، جاسامپاز كۇن ءتارتىبى مەن جاڭا كونستيتۋسيالىق قۇندىلىقتاردى ىلگەرىلەتۋ، پرەزيدەنتتىك باستامالاردىڭ ساپالى ءارى ءتيىمدى جۇزەگە اسىرىلۋىن قامتاماسىز ەتۋ»، – دەدى ەرلان كارين.
وتىرىس قورىتىندىسى بويىنشا جاۋاپتى مەملەكەتتىك ورگاندارعا ىشكى ساياساتتىڭ نەگىزگى باعىتتارىن پراكتيكالىق ىسكە اسىرۋ جونىندە تاپسىرمالار بەرىلدى.
بۇعان دەيىن «كۋرسيۆ» قازاقستاندا قازاق ءتىلىنىڭ جاڭا ورفوگرافيالىق سوزدىگى دايىندالاتىنىن جازعان بولاتىن – قولدانىستاعى نۇسقاسى 2013 جىلدان بەرى جاڭارتىلماعان. ەرلان كارين جوبانى بەدەلدى عالىمداردان قۇرىلعان ارنايى جۇمىس توبى ازىرلەيتىنىن، سودان كەيىن قۇجاتتى ۆەدومستۆوارالىق كوميسسيا قاراپ، بەكىتەتىنىن حابارلاعان.