كاسپي تەڭىزىندەگى وقۋ-جاتتىعۋ كەزىندە قازا تاپقان اعا لەيتەنانت ولجاس مۇحتار ۇلىنىڭ دەنەسى ارنايى اسكەري ۇشاقپەن تۇركىستانعا جەتكىزىلدى. قازاقستان قورعانىس مينيسترلىگى اسكەري قىزمەتشىنىڭ دەنەسى تۋعان جەرىنە جونەلتىلگەنىن حابارلادى، دەپ جازادى infohub.kz سايتى.
«ماڭعىستاۋ وبلىسىنداعى وقۋ-جاتتىعۋ بارىسىندا قازا تاپقان اعا لەيتەنانت ولجاس مۇحتار ۇلىنىڭ دەنەسى اسكەري ۇشاقپەن تۋعان جەرى — تۇركىستانعا جەتكىزىلدى»، — دەلىنگەن قورعانىس ۆەدومستۆوسىنىڭ حابارلاماسىندا.
ولجاس مۇحتار ۇلى تۇركىستان وبلىسىنىڭ تۋماسى بولاتىن. ونىڭ دەنەسى قوشتاسۋ مەن جەرلەۋ ءراسىمى ءۇشىن وڭىرگە اكەلىندى.
بۇعان دەيىن كاسپي تەڭىزىندەگى وقۋ-جاتتىعۋ كەزىندە قازا تاپقان باتىس قازاقستان وبلىسىنىڭ ءۇش اسكەري قىزمەتشىسىنىڭ دەنەسى ورالعا جەتكىزىلگەنى حابارلانعان. قوشتاسۋ مەن جەرلەۋ ءراسىمى 26 قىركۇيەكتە وتەدى.
ەسكە سالايىق، 24 قىركۇيەكتە اسكەري-تەڭىز كۇشتەرىنىڭ كاسپيدەگى وقۋ-جاۋىنگەرلىك مىندەتتەرىن ورىنداۋى كەزىندە كەنەتتەن باستالعان داۋىل مەن ەكپىندى جەلدەن 17 اسكەري قىزمەتشى اشىق تەڭىزگە اعىزىلىپ كەتكەن. وقيعا سالدارىنان 14 ادام قازا تاپتى.
توتەنشە وقيعانىڭ سەبەپتەرىن انىقتاۋ ءۇشىن پرەمەر-مينيستر ورىنباسارى قانات بوزىمبايەۆ باسقارعان ۇكىمەتتىك كوميسسيا قۇرىلدى. نەمقۇرايلىلىق جانە كەمە جۇرگىزۋ ەرەجەلەرىن بۇزۋ باپتارى بويىنشا قوزعالعان قىلمىستىق ءىس باس پروكۋراتۋرانىڭ ەرەكشە باقىلاۋىندا.
ساربازداردىڭ قازا تابۋىنا بايلانىستى پرەزيدەنت قاسىم-جومارت توقايەۆ 25 قىركۇيەكتى قازاقستاندا جالپىۇلتتىق ازا تۇتۋ كۇنى دەپ جاريالادى.
باس پروكۋراتۋرا 30 اسكەري قىزمەتشىدەن جاۋاپ الىپ، كۇدىكتىلەر شەڭبەرىن انىقتاعانىن مالىمدەدى.
كاسپيدەگى «حازار قورعانى – 2026» وقۋ-جاتتىعۋى كەزىندە اسكەري قىزمەتشىلەردىڭ قازا تابۋىنا قاتىستى ءىس بويىنشا قازاقستان قورعانىس مينيسترلىگىنىڭ بەس وفيسەرى ۇستالدى.