قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنىڭ كاسپي تەڭىزى جاعالاۋىنداعى وقۋ-جاتتىعۋى كەزىندە اسكەري قىزمەتشىلەردىڭ قازا تابۋىنا قاتىستى قىلمىستىق ءىس قوزعالدى. بۇل تۋرالى ۇكىمەتتىك كوميسسيا وتىرىسىندا ىشكى ىستەر ءمينيسترىنىڭ ورىنباسارى سانجار ءادىلوۆ باياندادى، دەپ حابارلايدى infohub.kz سايتى.
قىلمىستىق ءىس قازاقستان رەسپۋبليكاسى قىلمىستىق كودەكسىنىڭ 453-بابىنىڭ 2-بولىگى — «قىزمەتكە نەمقۇرايلى قاراۋ، اۋىر زارداپتارعا اكەپ سوققان» — جانە 465-بابى — «كەمە جۇرگىزۋ ەرەجەلەرىن بۇزۋ» بويىنشا قوزعالدى.
تەرگەۋ اياسىندا ۆەدومستۆوارالىق جەدەل-تەرگەۋ توبى قۇرىلدى. تەرگەۋ جانە جەدەل-ىزدەستىرۋ ءىس-شارالارىنىڭ كەشەنى جۇرگىزىلۋدە، ماماندار تارتىلىپ، قاجەتتى سوت ساراپتامالارى تاعايىندالدى.
پرەمەر-مينيستردىڭ ورىنباسارى قانات بوزىمبايەۆ بولعان وقيعانىڭ بارلىق ءمان-جايىن تولىق كولەمدە قىسقا مەرزىمدە انىقتاۋدى جانە تراگەدياعا كىنالى ادامدارعا شارا قولدانۋدى تاپسىردى.
ەسكە سالايىق، 24 قىركۇيەكتە ماڭعىستاۋ وبلىسىندا قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنىڭ كاسپي تەڭىزى جاعالاۋىنداعى وقۋ-جاتتىعۋى بارىسىندا اۋا رايىنىڭ كۇرت ناشارلاۋى مەن جەلدىڭ كۇشەيۋىنە بايلانىستى اسكەري قىزمەتشىلەردى تەڭىزگە اعىزىپ اكەتتى.
العاشىندا تەڭىزگە 19 اسكەري قىزمەتشى اعىزىلىپ كەتكەنى، 9 اسكەري قىزمەتشىنىڭ قازا تاپقانى بىردەن راستالعانى حابارلاندى. باس پروكۋراتۋرا اقتاۋ گارنيزونىندا قىلمىستىق ءىس قوزعالىپ، تەرگەلىپ جاتقانىن مالىمدەدى.
اسكەري قىزمەتشىلەر قازا تاپقاننان كەيىن ۇكىمەتتىك كوميسسيا قۇرىلىپ، توتەنشە وقيعا ورنىنا پرەمەر-مينيستردىڭ ورىنباسارى قانات بوزىمبايەۆ جىبەرىلدى. قازاقستان پرەزيدەنتى قاسىم-جومارت توقايەۆ ماڭعىستاۋ وبلىسىندا اسكەري قىزمەتشىلەردىڭ قازا تابۋىنا بايلانىستى كوڭىل ايتىپ، تراگەديانى تەرگەۋ جونىندە تاپسىرمالار بەردى.
اقتاۋدا قالا كۇنىنە وراي مەرەكەلىك ءىس-شارالار توقتاتىلدى. قاسىم-جومارت توقايەۆ 25 قىركۇيەكتى قازاقستاندا جالپىۇلتتىق ازا تۇتۋ كۇنى دەپ جاريالادى.
كوپ ۇزاماي پرەمەر-مينيستردىڭ ورىنباسارى قانات بوزىمباەۆتىڭ باسشىلىعىمەن كوميسسيا ماڭعىستاۋ وبلىسىنا كەلدى. كاسپي تەڭىزىندەگى وقۋ-جاتتىعۋ كەزىندە قازا تاپقانداردىڭ تۋىستارى مايىتتەردى انىقتاۋ ءۇشىن اقتاۋداعى ءمايىتحاناعا كەلدى.
24 قىركۇيەك كەشىندە ناقتىلانعان دەرەكتەر بەلگىلى بولدى. تەڭىزگە 17 ادام اعىزىلىپ كەتتى، ولاردىڭ 12ء-سى قازا تاپتى، ۇشەۋىن قۇتقارىپ قالۋ مۇمكىن بولدى. قالعان ەكى اسكەري قىزمەتشىنى ىزدەۋ جالعاسۋدا.
سونداي-اق قورعانىس مينيسترلىگى كاسپي تەڭىزىندەگى وقۋ-جاتتىعۋ كەزىندە قازا تاپقان اسكەريلەردىڭ ءتىزىمىن جاريالادى. تىزىمگە 11 ماتروس جانە ءبىر اعا لەيتەنانت ەندى.
بۇدان بولەك، قانات بوزىمبايەۆ كاسپي تەڭىزىندەگى تراگەدياعا كىنالى بارلىق لاۋازىمدى تۇلعالار «ارەكەتى نەمەسە ارەكەتسىزدىگى» ءۇشىن جازالاناتىنىن ۋادە ەتتى. ب ا ق كەيبىر قازا تاپقانداردىڭ دەموبيليزاسياعا دەيىن ساناۋلى كۇن قالعانىن ءبىلدى.
قورعانىس مينيسترلىگى ماڭعىستاۋ وبلىسىنداعى وقۋ-جاتتىعۋ كەزىندە قازا تاپقانداردىڭ وتباسىلارىنا كوڭىل ايتتى. سونداي-اق قازاقستان حالىق كەڭەسىنىڭ مۇشەلەرى قازا تاپقان اسكەري قىزمەتشىلەردىڭ وتباسىلارىنا 815 ملن تەڭگە جىبەرەتىنى بەلگىلى بولدى.