كاسپي تەڭىزىندە ءۇش ەر ادام تەڭىز سەرۋەنىنەن ورالماعان سوڭ، اۋقىمدى ىزدەۋ وپەراسياسى باستالدى. قۇتقارۋشىلار كەڭ اكۆاتوريانى تەكسەرىپ، بارلىق جوعالعانداردى ءتىرى كۇيىندە تاپتى، دەپ حابارلايدى infohub.kz.
كەشە كەشكە 112 پۋلتىنە جاڭاوزەننىڭ ءۇش تۇرعىنى «كەندەرلى» دەمالىس بازاسى ماڭىندا تەڭىزگە شىعىپ، قايتىپ ورالماعانى تۋرالى حابار ءتۇستى. ىزدەۋ-قۇتقارۋ جۇمىستارىنا توتەنشە جاعدايلار مينيسترلىگى مەن ۇلتتىق قاۋىپسىزدىك كوميتەتىنىڭ شەكارا قىزمەتىنىڭ كۇشتەرى مەن قۇرالدارى دەرەۋ جۇمىلدىرىلدى. ىزدەۋ بارىسىندا قۇتقارۋشىلار جاعاعا وزدىگىنەن ءجۇزىپ كەلە جاتقان ەر ادامدى تاۋىپ، ونى بورتقا كوتەرىپ، قۇرلىققا جەتكىزدى.
قالعان ەكەۋىن تۇندە ىزدەۋدى جالعاستىردى. ىزدەۋدى ءتۇننىڭ قاراڭعىلىعى مەن اكۆاتوريانىڭ ۇلكەن اۋماعى قيىنداتتى. جۇمىس ءتورت سەكتورعا ءبولىندى. قۇتقارۋشىلار 20 شاقىرىمنان استام اكۆاتوريانى، ال اۋە ارقىلى 70 شاقىرىمنان استام اۋماقتى تەكسەردى. ناتيجەسىندە قالعان ەكى ەر ادام جاعادان 10 شاقىرىم جەردە ىزدەۋ توبىمەن ءتىرى كۇيىندە تابىلدى.
ىزدەۋ-قۇتقارۋ وپەراسياسىنا بارلىعى تجم كۇشتەرى مەن قۇرالدارى، ۇقك شەكارا قىزمەتىنىڭ اسكەري قىزمەتكەرلەرى مەن ەرىكتىلەر تارتىلدى. سونداي-اق «قازاۆياقۇتقارۋ» تىكۇشاعى مەن ءتجم-نىڭ ۇشقىشسىز ۇشۋ اپپاراتتارى جۇمىلدىرىلدى.