قازاقستان العاشقى اتوم ەلەكتر ستانسياسى جوباسىن ءىس جۇزىندە ىسكە اسىرۋعا كوشتى: ونى جوبالاۋ مەن سالۋعا كەلىسىمشارتقا قول قويىلدى، دەپ حابارلايدى infohub.kz سايتى.
ق ر اتوم ەنەرگياسى اگەنتتىگىنىڭ مالىمەتىنشە، ۆلاديۆوستوكتا وتكەن XI شىعىس ەكونوميكالىق فورۋمى اياسىندا «قازاقستاندىق اتوم ەلەكتر ستانسيالارى» ج ش س مەن «اتومسترويەكسپورت» اق («روساتومنىڭ» ەنشىلەس كومپانياسى) اراسىندا قازاقستاندا اەس جوبالاۋ، جابدىقتاردى جەتكىزۋ جانە سالۋ بويىنشا كەلىسىمشارتقا قول قويىلدى.
اگەنتتىكتە كەلىسىمشارتقا قول قويۋ جوبانىڭ جاڭا، پراكتيكالىق كەزەڭگە وتكەنىن بىلدىرەتىنىن اتاپ ءوتتى. 2026 جىلعى 28 مامىرداعى ۇكىمەتارالىق كەلىسىمگە سايكەس، تاراپتار قازاقستان رەسپۋبليكاسىنىڭ ۇكىمەتىمەن كەلىسۋدى قوسا العاندا، كوزدەلگەن راسىمدەردى جالعاستىرادى.
ۆەدومستۆو جوبانىڭ ەل ءۇشىن ستراتەگيالىق ماڭىزىن ەرەكشە اتاپ ءوتتى: ەكونوميكانىڭ، ونەركاسىپتىڭ، ينفراقۇرىلىمنىڭ ءوسۋى، سيفرلاندىرۋ جانە جاساندى ينتەللەكتتىڭ دامۋى جاعدايىندا سەنىمدى ەلەكتر ەنەرگياسىنا قاجەتتىلىك ارتا تۇسەدى. اتوم ەنەرگەتيكاسى ونداعان جىلدار بويى تۇراقتى بازالىق گەنەراسيانى قامتاماسىز ەتىپ قانا قويماي، وتاندىق ونەركاسىپتى دامىتۋعا، وزىق تەحنولوگيالاردى ەنگىزۋگە جانە كادرلار دايارلاۋعا مۇمكىندىك بەرەدى.
جوبانى ىسكە اسىرۋ كەزىندە لوكاليزاسياعا — قازاقستاندىق كاسىپورىنداردى، مامانداردى، تاۋارلاردى، جۇمىستار مەن قىزمەتتەردى بارىنشا تارتۋعا ەرەكشە نازار اۋدارىلادى.
ەسكە سالايىق، بالقاش كولىندەگى ۇلكەن اۋىلىنىڭ ماڭىندا العاشقى اەس-تىڭ بەلسەندى قۇرىلىسى 2027 جىلى باستالادى. ستانسياعا حالىقتىق كونكۋرس قورىتىندىسى بويىنشا تاڭدالعان «بالقاش» اتاۋى بەرىلەدى.