قازاقستان مەن ءازىربايجان كوروناۆيرۋس پاندەمياسىنا بايلانىستى توقتاتىلعان كاسپي تەڭىزىندەگى جولاۋشىلار تاسىمالىن قايتا باستاۋ تۋرالى كەلىسىمگە كەلدى. بۇل تۋرالى قازاقستان رەسپۋبليكاسىنىڭ ءازىربايجانداعى ەلشىسى ءالىم بايەل حابارلادى، دەپ جازادى NUR.KZ، infohub.kz سايتىنا سىلتەمە جاساپ.
ديپلوماتتىڭ ايتۋىنشا، قازاقستاندىق تاراپ قۇرىق پورتى — باكۋ پورتى — قۇرىق پورتى باعىتىنداعى پاروم جەلىسىندە جولاۋشىلار قاتىناسىن قالپىنا كەلتىرۋ باستاماسىن كوتەردى. بۇل تاسىمالدار 2020 جىلعا دەيىن جۇمىس ىستەپ، COVID-19 پاندەمياسىنا بايلانىستى توقتاتىلعان ەدى.
ءالىم بايەل توقتاتىلعانعا دەيىن كاسپي ارقىلى جولاۋشىلار تاسىمالى قىزمەتىن جىلىنا شامامەن 1500 ادام پايدالانعانىن اتاپ ءوتتى. ديپلومات بولاشاقتا وسى باعىت بويىنشا ساپارعا شىققىسى كەلەتىندەردىڭ سانى ايتارلىقتاي ارتاتىنىنا سەنىم ءبىلدىردى. پاروم جەلىسىنىڭ قايتا جۇمىس ىستەۋى ەلدەر اراسىنداعى جولاۋشىلار قاتىناسىنىڭ دامۋىنا سەرپىن بەرىپ، تۋريستىك الماسۋدى كۇشەيتىپ، ورتا ءدالىزدىڭ مۇمكىندىكتەرىن كەڭەيتەدى دەپ كۇتىلۋدە.
ەلشى سونداي-اق ءازىربايجان تاراپى قازاقستاننىڭ ۇسىنىسىن قولداعانىن حابارلادى. قازىرگى ۋاقىتتا ەكى ەلدىڭ كولىك ۆەدومستۆولارى جولاۋشىلار قاتىناسىن تەزىرەك قالپىنا كەلتىرۋ بويىنشا جۇمىسقا كىرىستى. باكۋ مەن استانا، الماتى، شىمكەنت، اقتاۋ جانە اتىراۋ سياقتى قازاقستاندىق قالالار اراسىندا 37 اۋە رەيسى ورىندالاتىنى اتاپ ءوتىلدى.