قازاقستاندىق بالۋاندار حالىقارالىق ارەنادا وزدەرىنىڭ جوعارى دەڭگەيىن تاعى دا دالەلدەدى: باكۋدە اياقتالعان كۇرەس بويىنشا جاسوسپىرىمدەر (U17) الەم چەمپيوناتىندا قازاقستان قۇراماسى تاعى ءتورت مەدال جەڭىپ الدى، دەپ حابارلايدى infohub.kz سايتى.
قازاقستان كومانداسىنىڭ قورجىنىندا — ءبىر التىن جانە ءۇش قولا. 48 كەلىگە دەيىنگى سالماق دارەجەسىندە باكداۋلەت اگابەك التىن مەدال يەلەندى، ال قولا جۇلدەگەرلەر ماردان ورىنباسار (60 كگ)، ادىلەت رىسباي (71 كگ) جانە ينجۋ باككوجا (46 كگ) اتاندى.
ەركىن كۇرەس جارىسىندا باكداۋلەت اگابەك تاجىكستان، بولگاريا، موڭعوليا جانە وزبەكستان بالۋاندارىن جەڭىپ، فينالعا سەنىمدى جول تارتتى. شەشۋشى بەلدەسۋدە قازاقستاندىق سپورتشى ءۇندىستان وكىلى ارياندى باسىم ءتۇسىپ، ايقىن جەڭىسكە جەتتى.
قولا مەدال ءۇشىن وتكەن جۇبانىش بەلدەسۋلەرىندە ماردان ورىنباسار گرۋزيالىق بالۋان داۆيت مدزەۆاشۆيليدەن باسىم تۇسسە، ادىلەت رىسباي تۇرىكمەنستاندىق مەكان حۋدايبەرەنوۆتەن كۇشتىرەك بولدى.
وكىنىشكە قاراي، دانيار زامير (65 كگ) مەن ساعىندىق تەمىرعالي (110 كگ) ءۇشىنشى ورىن ءۇشىن بەلدەسۋدە جەڭىلىپ، تۇعىردان ءبىر قادام قالدى.
وسىلايشا، قازاقستاننىڭ ەركىن كۇرەس بويىنشا جاسوسپىرىمدەر قۇراماسى الەم بىرىنشىلىگىن ءبىر التىن جانە ەكى قولا مەدالمەن اياقتادى.
ايەلدەر كۇرەسى جارىسىندا قازاقستاندىق كوماندا دا مەدال قورجىنىن تولىقتىردى. ايشا ابدىمالىك (65 كگ) جەڭىپ العان كۇمىس مەدالدان بولەك، ينجۋ باككوجا ءۇشىنشى ورىن ءۇشىن بەلدەسۋدە رەسەيلىك الينا بارانوۆانى جەڭىپ، قولا جۇلدەنى يەلەندى.
ايانات مەينامباي (49 كگ) مەن ارۋجان باقىتنۇر (61 كگ) قولا مەدال ءۇشىن بەلدەسۋدە جەڭىلىپ، بەسىنشى ورىنمەن قوشتاستى.
ەسكە سالا كەتەيىك، بۇعان دەيىن قازاقستاننىڭ گرەك-ريم كۇرەسى بويىنشا جاسوسپىرىمدەر قۇراماسى بۇل چەمپيوناتتا ءۇش مەدال جەڭىپ العان بولاتىن: ديار امانالي (55 كگ) التىن، ءالي الماس (48 كگ) كۇمىس، ءالىنۇر تولەۋعالي (71 كگ) قولا.
كۇرەس بويىنشا جاسوسپىرىمدەر (U17) الەم چەمپيوناتى باكۋدە (ءازىربايجان) 27 شىلدە مەن 2 تامىز ارالىعىندا ءوتتى. جارىسقا 675 سپورتشى قاتىسىپ، 30 جۇلدە جيىنتىعىن ساراپقا سالدى — گرەك-ريم، ەركىن جانە ايەلدەر كۇرەسىنەن وننان.