2026 جىلدىڭ باسىنان بەرى قازاقستاندا دەنگە قىزباسىنىڭ اكەلىنگەن بەس جاعدايى تىركەلدى، دەپ حابارلايدى infohub.kz.
دەنساۋلىق ساقتاۋ مينيسترلىگى قازاقستاندىقتاردى دەنگە قىزباسىنىڭ اكەلىنگەن جاعدايلارى تۋرالى ەسكەرتتى. وسىعان بايلانىستى سانيتاريالىق-ەپيدەميولوگيالىق باقىلاۋ كوميتەتى شەتەلگە دەمالۋعا باراتىن ازاماتتارعا ۇسىنىستار جاسادى.
ساپاردا ءوزىڭىزدى قالاي قورعاۋعا بولادى
«اعىمداعى جىلدىڭ باسىنان بەرى قازاقستاندا دەنگە قىزباسىنىڭ اكەلىنگەن بەس جاعدايى تىركەلدى. وسىعان وراي، تروپيكتىك جانە سۋبتروپيكتىك كليماتتى ەلدەرگە باراتىن تۋريستەرگە قاراپايىم ەرەجەلەردى ساقتاۋ ۇسىنىلادى»، – دەلىنگەن ۆەدومستۆو حابارلاماسىندا.
ولاردىڭ قاتارىندا:
- كونديسيونەرلەرى مەن تەرەزە-ەسىكتەرىندە موسكيت تورلارى بار قوناقۇيلەردى نەمەسە تۇرعىن ۇيلەردى تاڭداۋ؛
- ەكسكۋرسيالار مەن تابيعات اياسىندا سەرۋەندەۋ كەزىندە، اسىرەسە، دەنەڭىزدى بارىنشا جاۋىپ تۇراتىن كيىم كيۋ (ۇزىن جەڭ، شالبار)؛
- بالالاردى جابىق كيىم كيگىزىپ، اربالار مەن كوتەرگىشتەردى مىندەتتى تۇردە موسكيتكە قارسى تورلارمەن جابۋ؛
- جاندىكتەردى قورقىتۋ ءۇشىن رەپەللەنتتەر قولدانۋ. كۇننەن قورعايتىن كرەم قولدانىلسا، ونىڭ ۇستىنە رەپەللەنت جاعۋ كەرەك.
سيمپتومدارى
دەنگە قىزباسىنىڭ نەگىزگى بەلگىلەرىنە ەڭ الدىمەن قالتىراۋمەن بىرگە 39–40 گرادۋسقا دەيىنگى جوعارى تەمپەراتۋرا، بۇلشىقەتتەردە، سۇيەكتەر مەن بۋىنداردا قاتتى سىرقىراۋ، سونداي-اق كوز ايماعىندا وتكىر اۋىرسىنۋ جاتادى. سونىمەن قاتار، بۇل اۋرۋ كەزىندە دەنەدەن مول بورتپە شىعىپ، بەت پەن مويىن قىزارادى. جۇقتىرعانداردا جۇرەك اينۋ، ءجيى قۇسۋ، تابەتتىڭ جوعالۋى، ايقىن السىزدىك، باس اينالۋ، تەرشەڭدىك جانە ليمفا تۇيىندەرىنىڭ ۇلعايۋى بايقالادى.
«ەگەر ساپاردان ورالعاننان كەيىن دەنساۋلىعىڭىز ناشارلاسا، دەرەۋ دارىگەرگە قارالىپ، بولعان ەلىڭىز تۋرالى مىندەتتى تۇردە حابارلاڭىز»، – دەلىنگەن كوميتەت حابارلاماسىندا.
بۇعان دەيىن «كۋرسيۆ» دەنگە قىزباسىنا قارسى Butantan-DV ۆاكسيناسى كلينيكالىق سىناقتاردان وتكەنىن جازعان بولاتىن. ءبىر دوزانىڭ اۋرۋدان جىلدار بويى قورعاي الاتىنى راستالدى. بۇرىن ادامنىڭ اۋىرعان-اۋىرماعانىنا بايلانىستى بىرنەشە دوزا قاجەت بولاتىن.