قازاقستان ەرىكتىلەر قوزعالىسىن دامىتۋ بويىنشا الەمدىك كوشباسشىلار قاتارىنا ەندى، دەپ مالىمدەدى بۇۇ ەرىكتىلەر باعدارلاماسىنىڭ اتقارۋشى ۇيلەستىرۋشىسى تويلي كۋربانوۆ پرەزيدەنت قاسىم-جومارت توقاەۆپەن كەزدەسۋدە، دەپ حابارلايدى infohub.kz.
كەزدەسۋ بارىسىندا مەملەكەت باسشىسى تويلي كۋربانوۆقا قازاقستاننىڭ ەرىكتىلىك سالاسىنداعى باستامالارىن قولداعانى جانە استانادا وتكەن تمد ەرىكتىلەر فورۋمىنا قاتىسقانى ءۇشىن العىس ءبىلدىردى.
پرەزيدەنت قازاقستان ەرىكتىلەر قوزعالىسىن دامىتۋعا ەرەكشە كوڭىل بولەتىنىن اتاپ ءوتتى. «ونىڭ دالەلى — ەلىمىزدىڭ 2026 جىلدى تۇراقتى دامۋ جولىنداعى حالىقارالىق ەرىكتىلەر جىلى دەپ جاريالاۋ تۋرالى ۇسىنىسى، ونى بۇۇ باس اسسامبلەياسى قولدادى»، — دەپ ەسكە سالدى ول.
توقايەۆ ەل ەرىكتىلىكتى شىنايى پاتريوتيزم مەن جاستاردى قولداۋدىڭ كورىنىسى رەتىندە قاراستىراتىنىن اتاپ ءوتتى. سونداي-اق ول حالىقارالىق ەرىكتىلەر جىلى اياسىندا قازاقستاندا مىڭنان استام ءىس-شارا ءوتىپ جاتقانىن، ال ەرىكتىلەر سانى 300 مىڭعا جۋىقتاعانىن ايتتى.
تويلي كۋربانوۆ ءوز كەزەگىندە مەملەكەت باسشىسىنا ەرىكتىلەر قوزعالىسىن دامىتۋعا كوڭىل بولگەنى ءۇشىن العىس ايتىپ، بۇۇ ەرىكتىلەر باعدارلاماسىمەن ىنتىماقتاستىق دەڭگەيى جوعارى ەكەنىن اتاپ ءوتتى. «60-تان استام ەل قازاقستاننىڭ ەرىكتىلەر جىلىن جاريالاۋ تۋرالى باستاماسىن قولدادى. ءسىز جاھاندىق ترەندتەردى بەلگىلەپ وتىرسىز، «تازا قازاقستان» سياقتى قوعامدىق اكسيا ءبىرقاتار ەلدەردە ۇلكەن قىزىعۋشىلىق تۋدىردى»، — دەدى ول.
قورىتىندىلاي كەلە، قاسىم-جومارت توقايەۆ بۇۇ ەرىكتىلەر باعدارلاماسىنىڭ اتقارۋشى ۇيلەستىرۋشىسىن قازاقستاندا ەرىكتىلىكتى دامىتۋعا قوسقان ەلەۋلى ۇلەسى ءۇشىن «دوستىق» وردەنىنىڭ II دارەجەسىمەن ماراپاتتادى.