كۇز-قىس كەزەڭى قارساڭىندا قازاقستاندا ماۋسىمدىق اۋرۋلاردىڭ ءورشۋىن بولدىرماۋعا باعىتتالعان ەپيدەمياعا قارسى شارالار كەشەنى قابىلداندى. رەسپۋبليكانىڭ باس مەملەكەتتىك سانيتاريالىق دارىگەرى 2026–2027 جىلدارداعى ەپيدەميولوگيالىق ماۋسىمعا دايىندىقتى رەتتەيتىن جىل سايىنعى قاۋلىعا قول قويدى، دەپ حابارلايدى infohub.kz سايتى.
قۇجاتقا سايكەس، 15 قىركۇيەكتەن باستاپ ەلىمىزدە حالىقتىڭ وسال توپتارىن تۇماۋعا قارسى ۆاكسيناسيالاۋ ناۋقانى باستالادى. 1 قازاننان باستاپ مەديسينا قىزمەتكەرلەرى ءۇشىن مىندەتتى ماسكا رەجيمى ەنگىزىلەدى، بۇل قاراپايىم ازاماتتارعا ازىرگە قاتىستى ەمەس.
ەمحانالاردا جرۆي بەلگىلەرى بار ناۋقاستاردى قابىلداۋ ءۇشىن وقشاۋلانعان سۇزگىلەر ۇيىمداستىرىلادى. سونىمەن قاتار، جۇكتى ايەلدەر مەن ءبىر جاسقا دەيىنگى بالالاردى ينفەكسيا بەلگىلەرى بايقالعاندا نەگىزىنەن ۇيدە قاراۋ جوسپارلانۋدا.
سونىمەن قاتار، اۋرۋحانالار دارى-دارمەك قورىن قامتاماسىز ەتىپ، توسەك قورىن باقىلاۋدى كۇشەيتەدى. ەگەر ينفەكسيالىق جانە رەانيماسيا بولىمشەلەرىنىڭ جۇكتەمەسى 85% جەتسە، قوسىمشا رەزەرۆتىك ورىندار اشىلادى.
ەپيدەميولوگيالىق باقىلاۋ دا كۇشەيتىلەدى: 1 قىركۇيەكتەن باستاپ سىرقاتتانۋشىلىق دەڭگەيى اپتا سايىن، ال 1 قازاننان باستاپ كۇن سايىن باقىلاناتىن بولادى. بۇل جاعداي ناشارلاعان كەزدە ناقتى شەكتەۋلەردى جەدەل ەنگىزۋگە مۇمكىندىك بەرەدى.
ەلىمىزدىڭ وقۋ ورىندارىندا الدىن الۋ شارالارى اياسىندا كەلۋشىلەردى باقىلاۋ جانە تاڭەرتەڭگى سۇزگىلەر ەنگىزىلەدى. جرۆي ورشىگەن جاعدايدا كەلەسى شارالار قاراستىرىلعان: سىنىپتا سىرقاتتانۋشىلىق 20-30% قۇراسا، ول 7 كۇنگە مەديسينالىق باقىلاۋعا الىنىپ، كابينەتتەر اراسىنداعى اۋىسۋلار توقتاتىلادى. ەگەر سىرقاتتانۋشىلىق 30%-دان اسسا، سىنىپ تولىعىمەن قاشىقتان وقىتۋعا كوشىرىلەدى، ال بالاباقشا توبىنىڭ جۇمىسى توقتاتىلادى.
ەسكە سالايىق، وتكەن جىلدىڭ قاراشا ايىندا استانادا جرۆي جانە تۇماۋمەن سىرقاتتانۋشىلىقتىڭ ءوسۋى بايقالدى. سول كەزدە كوپتەگەن مەكەمەلەر مەن كەڭسەلەردە كوروناۆيرۋس پاندەمياسىنىڭ العاشقى جىلدارىنداعىداي ماسكا رەجيمى قايتا ەنگىزىلگەن ەدى.