قازاقستان الەمنىڭ ەڭ باسەكەگە قابىلەتتى ەكونوميكالارىنىڭ حالىقارالىق رەيتينگىسىندە 38-ورىنعا تۇراقتاپ، تمد ەلدەرىنىڭ ىشىنەن وسى تىزىمگە ەنگەن جالعىز مەملەكەت اتاندى. بۇل تۋرالى IMD World Competitiveness Center جاريالاعان جاھاندىق زەرتتەۋ قورىتىندىسىندا ايتىلعان، دەپ حابارلايدى infohub.kz سايتى.
شۆەيساريالىق IMD World Competitiveness Center ورتالىعىنىڭ جىل سايىنعى زەرتتەۋى الەمنىڭ 70 ەلىنىڭ ەكونوميكاسىن ءتورت نەگىزگى باعىت بويىنشا باعالايدى: ەكونوميكالىق كورسەتكىشتەر، ۇكىمەت تيىمدىلىگى، بيزنەس تيىمدىلىگى جانە ينفراقۇرىلىم. اعىمداعى تىزىمدە قازاقستان 65.4 بالل جيناپ، 38-ورىنعا يە بولدى.
رەيتينگتىڭ باسىندا الەمنىڭ جەتەكشى 10 ەلى ورنالاستى: سينگاپۋر (100 بالل)، گونكونگ (95.6 بالل)، شۆەيساريا (95.3 بالل)، تايۆان (94.3 بالل)، ءباا (94.1 بالل)، دانيا (94.1 بالل)، يرلانديا (94.1 بالل)، نيدەرلاند (90.1 بالل)، شۆەسيا (88.5 بالل) جانە اقش (86.8 بالل).
وسى جاھاندىق تىزىمدە قازاقستان ءوز كورسەتكىشتەرىنىڭ ارقاسىندا يسپانيا، پورتۋگاليا، پولشا، يتاليا جانە ارگەنتينا سياقتى ءبىرقاتار مەملەكەتتەردى باسىپ وزدى.
ەلدىڭ ءتورت نەگىزگى باعىت بويىنشا جەكە پروفيلىندە مىناداي كورسەتكىشتەر تىركەلگەن: ۇكىمەت تيىمدىلىگى (Government Efficiency) بويىنشا قازاقستان 63.0 بالل جيناپ، 23-ورىنعا تۇراقتادى. بيزنەس تيىمدىلىگى (Business Efficiency) باعىتىندا ەل 66.5 باللمەن 23-ورىندى يەلەندى.
سونىمەن قاتار ينفراقۇرىلىم (Infrastructure) كورسەتكىشى 46.2 باللدى قۇراپ، بۇل سالادا ەل 43-ورىندا ورنالاستى، ال ەكونوميكالىق كورسەتكىشتەر (Economic Performance) باعىتى بويىنشا 43.5 باللمەن 57-ورىنعا بەكىدى.
زەرتتەۋ اياسىندا قازاقستاننىڭ نەگىزگى ماكروەكونوميكالىق كورسەتكىشتەرى دە ۇسىنىلدى: جالپى ىشكى ءونىم (ءجىو) كولەمى 306.2 ميلليارد دوللاردى قۇراپ، بۇل كورسەتكىش بويىنشا ەل 44-ورىنعا تۇراقتادى.
ساتىپ الۋ قابىلەتىنىڭ پاريتەتى (ساقپ) بويىنشا جان باسىنا شاققانداعى ءجىو 45،286.3 دوللارعا جەتىپ، 43-ورىندى بەكىتتى. ەلدىڭ ءجىو-نىڭ ناقتى ءوسىمى 6.5%-دى قۇراپ، بۇل كورسەتكىش بويىنشا ەل 6-ورىندا تۇر.
بۇل رەتتە حالىق سانى 20.4 ميلليون ادامدى (32-ورىن)، جۇمىسسىزدىق دەڭگەيى 4.6%-دى (31-ورىن)، ال تۇتىنۋ باعالارىنىڭ ينفلياسياسى 11.4%-دى (65-ورىن) قۇرادى.