قازاقستان شىلدە ايىندا كاسپي قۇبىر كونسورسيۋمىنىڭ (كتك) ينفراقۇرىلىمىنا جاسالعان شابۋىلداردان كەيىن مۇناي مەن گاز ءوندىرىسىنىڭ تومەندەۋىنە بايلانىستى $700 ملن استام قاراجات الا الماۋى مۇمكىن، دەپ حابارلايدى infohub.kz.
مۇنداي باعانى ەنەرگەتيكا جانە ينۆەستيسيا سالاسىنداعى ساراپشى ولجاس ءبايدىلدينوۆ Reuters جاريالاعان دەرەكتەرگە تۇسىنىكتەمە بەرە وتىرىپ ايتتى. Reuters اقپاراتىنا سايكەس، 2026 جىلدىڭ شىلدەسىندە قازاقستاندا مۇناي مەن گاز كوندەنساتىن ءوندىرۋ ماۋسىممەن سالىستىرعاندا 14 پايىزعا تومەندەگەن.
ءبايدىلدينوۆتىڭ ايتۋىنشا، شىلدەدە ءوندىرىس 7،6 ملن توننانى نەمەسە تاۋلىگىنە شامامەن 1،85 ملن باررەلدى قۇرادى، ال ءبىر اي بۇرىن بۇل كورسەتكىش 8،6 ملن تونناعا نەمەسە تاۋلىگىنە 2،16 ملن باررەلگە جەتكەن. ساراپشىنىڭ سوزىنشە، كەيبىر كۇندەرى ءوندىرىس كولەمى 50 پايىزدان استامعا قىسقارعان. ول مۇنى قازاقستان مۇنايىنىڭ ەكسپورتىنا اسەر ەتكەن تانكەرلەر مەن كتك ينفراقۇرىلىمىنا جاسالعان ۇشقىشسىز ۇشاق شابۋىلدارىمەن بايلانىستىرادى.
ءبايدىلدينوۆ 2025 جىلى قازاقستان ايىنا ورتا ەسەپپەن 8،3 ملن توننا مۇناي مەن گاز كوندەنساتىن وندىرگەنىن ەسكە سالدى. ونىڭ ايتۋىنشا، سالا كتك نىساندارىنا قاراشا ايىندا جاسالعان شابۋىلدان كەيىن عانا قالپىنا كەلە باستاعان ەدى، سونىڭ سالدارىنان ەكىنشى شىعارۋ پريچالى ىستەن شىققان، الايدا جاڭا وقيعالار ءوندىرىستىڭ ءوسۋىن قايتادان تەجەدى.
ساراپشى سونداي-اق شىلدەدە Brent مۇنايىنىڭ ورتاشا باعاسى باررەلىنە شامامەن $87 بولعانىن اتاپ ءوتتى. ونىڭ ەسەپتەۋىنشە، ءوندىرىستىڭ شامامەن 1 ملن تونناعا قىسقارۋىنا بايلانىستى ەل مۇنايدان تۇسەتىن كىرىستىڭ كەمىندە $635 ملن جوعالتقان. «گاز ءوندىرىسىنىڭ تومەندەۋىن ەسكەرسەك، بۇل جوعالتىلعان سوما تەك شىلدە ايىندا $700 ملن-نان وڭاي اسادى»، – دەدى ءبايدىلدينوۆ.
كتك سوڭعى كەزدەرى بىرنەشە رەت شابۋىل نىسانىنا اينالدى. 2025 جىلدىڭ اقپانىندا جەتى ۇشقىشسىز ۇشاق ەڭ ءىرى مۇناي ايداۋ ستانسياسى «كروپوتكينسكاياعا» سوققى بەردى. وسىدان كەيىن جۇيە بويىنشا مۇناي ايداۋ 30-40 پايىزعا قىسقاردى. كۇزدە تەڭىز تەرمينالىنىڭ پريچال قۇرىلعىلارىنىڭ ءبىرى زاقىمداندى. ال شابۋىلداردىڭ جاڭا تولقىنى 2026 جىلدىڭ شىلدەسىندە بولدى: قازاقستان مۇنايىن تاسىمالداعان Nordic Zenith، ASIA، NISSOS IOS جانە NELSA تانكەرلەرى زاقىمداندى. وسىعان بايلانىستى كتك مۇناي قابىلداۋدى جانە تيەۋدى ۋاقىتشا توقتاتۋعا ءماجبۇر بولدى.
الدىڭعى كۇنى ۇلتتىق بانك ءتوراعاسى تيمۋر سۇلەيمەنوۆ كتك ارقىلى مۇناي ەكسپورتىنىڭ ۋاقىتشا توقتاتىلۋىنا بايلانىستى تەڭگە باعامىنىڭ كۇرت اۋىتقۋىن كۇتپەيتىنىن مالىمدەدى. سونىمەن قاتار، ۇلتتىق بانك باعامنىڭ نارىقتىق ەمەس اۋىتقۋى بايقالعان جاعدايدا شارا قولدانۋعا دايىن. ال ق ر ەنەرگەتيكا مينيسترلىگى قازاقستاندىق مۇنايدى قابىلداۋدىڭ تەزىرەك قايتا باستالۋىنا ءۇمىت ارتىپ وتىر.