قازاقستاندىق جەڭىل اتلەتتەر جانكۇيەرلەردى قۋانتۋدى جالعاستىرۋدا: تاشكەنتتە ءوتىپ جاتقان ورتالىق ازيا چەمپيوناتىندا ولار تاعى ەكى التىن مەدال جەڭىپ الدى، دەپ حابارلايدى infohub.kz.
جارىستىڭ العاشقى كۇنى وزبەكستان استاناسىندا الينا چيستياكوۆا ۇزىندىققا سەكىرۋدە 6،10 مەتر ناتيجەمەن ۇزدىك شىعىپ، ەڭ جوعارعى ساتىعا كوتەرىلدى. بۇل پاندە تاعى ءبىر قازاقستاندىق اناستاسيا رىپاكوۆا (6،09) كۇمىس الدى. ول وليمپيادا چەمپيونى ولگا رىپاكوۆانىڭ قىزى. ۇشتىكتى سينگاپۋردان كەلگەن روزاريو تيا لۋيزا (5،95) تۇيىندەدى.
قازاقستاندىق جۇگىرۋشى يۋليا باشمانوۆا 100 مەترگە كەدەرگىلەرمەن جۇگىرۋدە 13،75 سەكۋند كورسەتىپ، جەڭىسكە جەتتى. قولانى ونىڭ وتانداسى انتونينا چەرنىشوۆا (14،58) السا، كۇمىس وزبەكستاندىق ليديا پودسەپيكيناعا (13،84) بۇيىردى.
تاعى ءبىر مەدالدى قازاقستان قۇراماسىنىڭ قورجىنىنا اكبيلەك كۋرالباي سالدى. ول 3000 مەترگە كەدەرگىلەرمەن جۇگىرۋدە (10 مينۋت 51،59 سەكۋند) قولا جۇلدەگەر اتاندى. ودان تەك وزبەكستاندىقتار ديلشودا ۋسمونوۆا (10:16،12) مەن سادافبونۋ نۋسراتيللوەۆا (10:39،10) وزىپ كەتتى.
وسىلايشا، اشىق ورتالىق ازيا چەمپيوناتىنىڭ العاشقى كۇنىندە قازاقستان قۇراماسى ءۇش التىندى قوسا ەسەپتەگەندە جەتى مەدال جەڭىپ الدى. بۇعان دەيىن نايزا لاقتىرۋشى ۇلبولسىن ەسىركەپ ەڭ جوعارعى ساتىعا كوتەرىلگەن ەدى.