«ميسس الەم – 2026» حالىقارالىق بايقاۋىندا قازاقستان اتىنان باعىم بالتاباەۆا ونەر كورسەتەدى. ول 2024 جىلى Miss Qazaqstan اتاعىن جەڭىپ العان بولاتىن، دەپ حابارلايدى infohub.kz سايتى.
بيىلعى بايقاۋ ۆەتنامدا ءوتىپ، وعان جۇزدەن استام ەلدىڭ قاتىسۋشىلارى جينالادى. Miss Qazaqstan بايقاۋىنىڭ ديرەكتورى رامينا يبراگيموۆا «ميسس الەم» — بۇل تەك سۇلۋلىق بايگەسى ەمەس، «ماعىنالى سۇلۋلىق» فيلوسوفياسى بار الاڭ ەكەنىن اتاپ ءوتتى. مۇندا تەك سىرتقى كەلبەت قانا ەمەس، جەكە قاسيەتتەر مەن وزىندىك قايىرىمدىلىق جوباسىن تانىستىرا ءبىلۋ دە ەسكەرىلەدى. سوندىقتان ۇلتتىق ىرىكتەۋ جەڭىمپازدارى جىل بويى قايىرىمدىلىقپەن بەلسەندى اينالىسادى.
باعىم بالتاباەۆا وسكەمەن قالاسىنان. ول سارسەن امانجولوۆ اتىنداعى شىعىس قازاقستان ۋنيۆەرسيتەتىن پەداگوگيكا ماماندىعى بويىنشا بىتىرگەن. بايقاۋعا دايىندىق بارىسىندا قىز جالعىزباستى انالار مەن قيىن ومىرلىك جاعدايعا تاپ بولعان بالالى وتباسىلاردى قولداۋعا باعىتتالعان قايىرىمدىلىق جوبالارعا باسىمدىق بەردى.
بايقاۋدىڭ ماڭىزدى كەزەڭى — ۇلتتىق كوستيۋمدى تانىستىرۋ. قازاقستان اققۋ بەينەسى ارقىلى قازاق ايەلىنىڭ بەينەسىن كورسەتەدى. باعىمنىڭ ايتۋىنشا، ونىڭ ۇلتتىق كوستيۋمىنىڭ نەگىزىنە اققۋ — تازالىق پەن ادالدىقتىڭ، رۋحاني كۇشتىڭ سيمۆولى الىنعان. وسى بەينە ارقىلى ول قازاق ايەلىنىڭ نازىكتىگىن، ابىرويىن جانە باي ىشكى الەمىن جەتكىزگىسى كەلەدى.
قازاقستان وكىلى 7 تامىزدا ۆەتنامعا اتتانىپ، ءبىر اي بويى بايقاۋ باعدارلاماسىنا، حالىقارالىق مادەني ءىس-شارالارعا جانە «ميسس الەمنىڭ» رەسمي شارالارىنا قاتىسادى. وتانعا ورالۋ 7 قىركۇيەككە جوسپارلانعان.