قازاقستاندا ودكب-نىڭ «رۋبەج-2026» بىرلەسكەن وقۋ-جاتتىعۋىنا دايىندىق ءجۇرىپ جاتىر. وسىعان بايلانىستى 7-30 قىركۇيەك ارالىعىندا ەلىمىزدىڭ ءۇش ءوڭىرىنىڭ اۋماعىندا اسكەري تەحنيكا مەن جەكە قۇرام قوزعالادى، دەپ حابارلايدى infohub.kz سايتى.
قورعانىس مينيسترلىگىنىڭ مالىمەتىنشە، اسكەري تەحنيكا الماتى جانە جامبىل وبلىستارىندا، سونداي-اق جەتىسۋ وبلىسىندا بايقالادى.
وقۋ-جاتتىعۋدىڭ نەگىزگى بولىگى 12-19 قىركۇيەك ارالىعىندا جەتىسۋ وبلىسىنداعى «كوكتال» پوليگونىندا وتەدى.
«وقۋ-جاتتىعۋ بارىسىندا دالالىق ساباقتار وتكىزىلەدى، ولاردىڭ اياسىندا اسكەرلەردى قايتا توپتاستىرۋ، بولىمشەلەردى باسقارۋ جانە قويىلعان مىندەتتەردى ورىنداۋ ماسەلەلەرى پىسىقتالادى»، — دەدى قورعانىس مينيسترلىگىندە.
ۆەدومستۆو وقۋ-جاتتىعۋلار ودكب-عا مۇشە ەلدەردىڭ جوسپارلى جاۋىنگەرلىك دايارلىعى اياسىندا وتەتىنىن ءتۇسىندىردى. «رۋبەج» وقۋ-جاتتىعۋى تۇراقتى تۇردە وتكىزىلىپ، ءار جولى ۇيىمعا مۇشە ەلدەردىڭ ءبىرىنىڭ اۋماعىندا وتەدى.
ۆەدومستۆو سونداي-اق اسكەري تەحنيكانىڭ قوزعالىسى تۋرالى تەكسەرىلمەگەن اقپاراتتى تاراتپاۋعا جانە رەسمي اقپاراتقا سۇيەنۋگە شاقىردى.
قازاقستاندا ادەيى جالعان اقپارات تاراتقانى ءۇشىن زاڭ بويىنشا جاۋاپكەرشىلىك قاراستىرىلعانىن قورعانىس مينيسترلىگى ەسكە سالدى.
بۇعان دەيىن قازاقستاندىقتار تامىز جانە قىركۇيەك ايلارىندا جولداردا اسكەري تەحنيكانى، قارۋ-جاراق تيەلگەن تەمىرجول ەشەلوندارىن جانە اسكەري ۇشاقتاردى بايقاۋى مۇمكىن ەكەندىگى تۋرالى ەسكەرتىلگەن بولاتىن. قورعانىس مينيسترلىگى بۇل «باتىل تويتارىس – 2026» ستراتەگيالىق كوماندالىق-شتابتىق وقۋ-جاتتىعۋىنا دايىندىققا بايلانىستى ەكەنىن ءتۇسىندىردى.