Қазақстан энергетика министрі Ерлан Ақкенженов республиканың ресейлік тарапқа «Дружба» мұнай құбыры арқылы қазақстандық мұнай айдауды қайта бастау туралы ресми сұрау жібергенін, енді жауап күтіп отырғанын мәлімдеді, деп хабарлайды infohub.kz сайты.
Бұл туралы министр үкімет кулуарында журналистердің сұрақтарына жауап беру кезінде айтты. Одан қазақстандық мұнайдың «Дружба» арқылы қараша мен желтоқсанда жеткізілуі жоспарланып отырғаны, сондай-ақ 2027 жылға арналған перспективалар қандай екені сұралды.
«Жеткізуге техникалық мүмкіндік бар. Қазақстан тарапы ресми сұрау жіберді және оларды қайта бастау мәселесі бойынша ресейлік тараптың жауабын күтіп отыр», — деді Ақкенженов.
Оның айтуынша, нақты мерзімдерді ресейлік тараптан жауап келгеннен кейін ғана атауға болады. Сонымен қатар энергетика министрі Қазақстанда 2027 жылы мұнай өндіру шамамен 99 млн тоннаны құрайтынын хабарлады.
Еске салайық, сәуірде Ерлан Ақкенженов «Дружба» арқылы мұнай жеткізудің тоқтатылғаны туралы айтқан болатын. Ол техникалық мүмкіндік мәселесі шешілген бойда қазақстандық мұнай транзиті қайта жалғасатынын атап өткен.
Кейін «Дружба» мұнай құбыры арқылы Қазақстан мұнайын Германияға жеткізудің тоқтатылуын Ресей Федерациясының вице-премьері Александр Новак түсіндірді. Жағдайды Ресей Федерациясы басшысы Владимир Путиннің баспасөз хатшысы Дмитрий Песков та түсініктеме берді.
Сондай-ақ Қазақстан «Дружба» жағдайына байланысты Германияға мұнай экспортының бағыттарын өзгерткені хабарланған болатын.