قازاقستاندىق ارتيستيكالىق ءجۇزۋ شەبەرلەرى بۋداپەشتە ءوتىپ جاتقان 2026 جىلعى جاسوسپىرىمدەر اراسىنداعى الەم چەمپيوناتىندا ءبىر كۇندە ەكى مەدال جەڭىپ الىپ، ەرەكشە جەتىستىككە جەتتى، دەپ حابارلايدى infohub.kz سايتى.
ارالاس دۋەتتەردىڭ ەركىن باعدارلاماسىندا ياسمينا يسلاموۆا مەن الديار رامازانوۆ 248،1058 ۇپاي جيناپ، ەكىنشى ورىنعا يە بولدى. ولار تەك 263،2992 ۇپاي جيناعان يسپاندىق ارلەت ارنان سانتاكرۋس پەن ەنەكو سانچەس اگيلار دۋەتىنەن عانا قالىس قالدى. ال قولا جۇلدەنى 246،9850 ۇپايمەن جاپوندىق حەيزو ايتاكا مەن مانامي دودو يەلەندى.
بۇل كۇمىس قازاقستان ءۇشىن جاسوسپىرىمدەر اراسىنداعى الەم چەمپيوناتتارىندا ميكست-دۋەتتەردەگى العاشقى مەدال بولدى، سوندىقتان ول تاريحي جەتىستىك سانالادى.
سول كۇنى ۇلتتىق قۇراما اكروباتيكالىق باعدارلامادا دا كوزگە ءتۇستى. سوفيا يششەنكو، ياسمينا يسلاموۆا، دايانا جامانچالوۆا، ماكپال كالمۋرزا، پولينا مەرزلياكوۆا، الديار رامازانوۆ، ايگانىم سايم جانە اناستاسيا ۆورونكوۆادان قۇرالعان قازاقستان قۇراماسى 203،0926 ۇپاي جيناپ، ەكىنشى ورىنعا يە بولدى.
بۇل پاندە جەڭىستى 232،2147 ۇپايمەن رەسەي قۇراماسى باعىندىرسا، قولا جۇلدەنى 200،9777 ۇپايمەن بەلارۋس كومانداسى الدى.
وسىلايشا، قازاقستان قۇراماسىنىڭ قورجىنىندا وسى تۋرنيردە ءۇش مەدال بار. بۇعان دەيىن ۆيكتور درۋزين جەكە تەحنيكالىق باعدارلامادا قولا جۇلدەگەر اتانعان بولاتىن.
ۆەنگريا استاناسىنداعى جارىس 16 تامىزدا اياقتالادى.