قازاقستان عارىش تەحنيكاسىنىڭ حالىقارالىق نارىعىنا شىعۋدى كوزدەپ وتىر: ەلدە سپۋتنيكتەر مەن ولاردىڭ قۇرامداس بولىكتەرىن ءوندىرۋ جولعا قويىلىپ، كەيىننەن ولاردى ورتالىق ازياعا، تاياۋ شىعىسقا جانە ەۋروپاعا جەتكىزۋ جوسپارلانۋدا، دەپ حابارلايدى infohub.kz سايتى.
جوبا وڭتۇستىك كورەيانىڭ عارىش سالاسىنداعى ءىرى ويىنشىلارىنىڭ ءبىرى — CONTEC Space Group كومپانياسىمەن تالقىلانۋدا. پرەمەر-مينيستردىڭ ورىنباسارى – جاساندى ينتەللەكت جانە سيفرلىق دامۋ ءمينيسترى جاسلان مادييەۆ سەۋلدەگى كومپانيانىڭ قۇراستىرۋ-سىناق كەشەنىنە بارىپ، ونىڭ باسقارما ءتوراعاسى لي سونحيمەن كەزدەستى.
كورەيلىق توپ قازاقستاندىق «عالام» جوباسىنا قارجى سالۋ مۇمكىندىگىن قاراستىرىپ وتىر. اڭگىمە تەك قارجىلاي قاتىسۋ تۋرالى عانا ەمەس، سونىمەن قاتار سپۋتنيكتەردى بىرلەسىپ قۇراستىرۋ، قۇرامداس بولىكتەر شىعارۋ جانە جەرۇستى ستانسيالار جەلىسىن دامىتۋ تۋرالى بولىپ وتىر.
كەلىسسوزدەردىڭ باستى ناتيجەسى قازاقستاندا تولىققاندى وندىرىستىك حاب قۇرۋ بولۋى مۇمكىن. وندا ىشكى نارىق پەن ەكسپورتقا ارنالعان سپۋتنيكتىك قۇرامداس بولىكتەر شىعارىلماق. تاعى ءبىر ىقتيمال جوبا — ءىرى گاباريتتى انتەننا جۇيەلەرىن ءوندىرۋدى جەرگىلىكتەندىرۋ.
عارىشتىق سۋرەتتەردى تاراپتار جاساندى ينتەللەكت كومەگىمەن وڭدەۋدى ۇسىنىپ وتىر. بۇل جەردى قاشىقتىقتان زوندتاۋ دەرەكتەرىن جىلدام تالداۋعا جانە ولاردى، مىسالى، اۋىل شارۋاشىلىعى جەرلەرىن، تابيعي اۋماقتار مەن ينفراقۇرىلىمدى باقىلاۋعا پايدالانۋعا مۇمكىندىك بەرەدى.
CONTEC Space Group قۇرامىنا CONTEC، Asia Pacific Satellite Corporation جانە Texas Space Communication كومپانيالارى كىرەدى. توپ وڭتۇستىك كورەيانىڭ مەملەكەتتىك سپۋتنيكتەرىنە ارنالعان بورتتىق كومپيۋتەرلەردى جەتكىزىپ، اقش، چيلي، وار جانە اۆستراليانى قوسا العاندا، ءارتۇرلى ەلدەردەگى 17 جەرۇستى ستانسياسىن باسقارادى.
جاقىن ارادا كورەيلىك كومپانيا قازاقستاندا ەنشىلەس قۇرىلىم تىركەۋدى جوسپارلاپ وتىر. ىنتىماقتاستىقتىڭ ناقتى پارامەترلەرى پرەزيدەنت قاسىم-جومارت توقاەۆتىڭ وڭتۇستىك كورەياعا مەملەكەتتىك ساپارى بارىسىندا ۇسىنىلۋى ءتيىس.