قازاقستاندا جەڭىل ونەركاسىپ تاۋارلارىن تاڭبالاۋ جانە قاداعالاۋ قاعيدالارى بەكىتىلدى: نەگىزگى تالاپتار 2026 جىلعى 14 قاراشادا كۇشىنە ەنەدى، ال كودتاردى بىرىكتىرۋ مەن تاۋار اينالىمى تۋرالى مالىمەتتەردى بەرۋگە قاتىستى جەكەلەگەن نورمالار 2027 جىلعى 1 قازاننان باستاپ قولدانىلادى، دەپ حابارلايدى infohub.kz سايتى.
تاڭبالاۋ «جەڭىل ونەركاسىپ» توبىنىڭ تاۋارلارىن قامتيدى: كيىم، توسەك-ورىن جانە اس ۇستەلىنە ارنالعان زىعىر ماتادان جاسالعان بۇيىمدار، شالىلەر مەن ورامالدار، گالستۋكتەر، سونداي-اق تابيعي بىلعارى مەن جاساندى تەرىدەن جاسالعان بۇيىمدار. ناقتى تىزبە ەۋرازيالىق ەكونوميكالىق وداقتىڭ سىرتقى ەكونوميكالىق قىزمەتىنىڭ تاۋار نومەنكلاتۋراسى (ەاەو سەق تن) كودتارى بويىنشا ايقىندالادى. تالاپتار تاۋاردىڭ پىشىنىنە، ولشەمىنە، ماقساتىنا، ءوندىرىلۋ تاسىلىنە جانە ماتەريالىنا قاراماستان قولدانىلادى.
ءونىمدى تاڭبالاۋ مىندەتى وندىرۋشىلەرگە، يمپورتتاۋشىلارعا، كوتەرمە جانە بولشەك ساۋداگەرلەرگە، سونداي-اق كوميسسيونەرلەرگە — قازاقستان رەزيدەنتى بولىپ تابىلاتىن جەكە كاسىپكەرلەر مەن زاڭدى تۇلعالارعا جۇكتەلەدى. ءوندىرۋشى كودتى تاۋاردى باسقا مەنشىك يەسىنە ءبىرىنشى رەت بەرگەنگە دەيىن قويۋعا ءتيىس. يمپورتتاۋشى تاۋاردى قازاقستانعا اكەلگەنگە دەيىن نە ونى ىشكى تۇتىنۋ ءۇشىن شىعارۋ نەمەسە رەيمپورت كەدەندىك راسىمدەرىنە ورنالاستىرعانعا دەيىن تاڭبالايدى. كوميسسيونەر وتكىزۋگە قابىلدانعان تاۋاردى ساتۋ ورنىندا قويعانعا دەيىن تاڭبالاۋعا مىندەتتى.
تاڭبالاۋ ءۇشىن DataMatrix GS1 ەكى ولشەمدى كودى پايدالانىلادى. ونى تاۋارعا، تۇتىنۋ نەمەسە توپتىق قاپتاماعا نە تاۋارلىق جاپسىرماعا تىكەلەي قويۋعا بولادى، ءارى كود ونى زاقىمداماي الۋ مۇمكىن بولمايتىنداي ەتىپ قويىلۋى ءتيىس. جۇمىستى باستاماس بۇرىن اينالىمعا قاتىسۋشى تاۋارلاردى سيفرلىق تاڭبالاۋ جانە قاداعالاۋ جۇيەسىندە تىركەلىپ، وندا تاۋاردى تىركەۋگە جانە وپەراتوردان تاڭبالاۋ كودتارىن الۋعا ءتيىس. كودتى قويعاننان كەيىن قاتىسۋشى 60 كۇنتىزبەلىك كۇن ىشىندە جۇيەگە تاڭبالاۋ تۋرالى مالىمەتتەردى بەرۋى كەرەك؛ ايتپەسە پايدالانىلماعان كودتار جويىلادى. تاڭبالاۋ كودتارىن الۋ اقىلى بولادى — قىزمەت وپەراتورعا شارت بويىنشا تولەنەدى.
تاڭبالانعان تاۋاردى ساتقان كەزدە بولشەك ساتۋشى ونى اينالىمنان شىعارۋعا ءتيىس. ول ءۇشىن دەرەكتەردى تىركەۋ جانە بەرۋ فۋنكسياسى بار باقىلاۋ-كاسسا ماشيناسى، وعان قوسىلعان كودتاردى سكانەرلەۋگە ارنالعان قۇرىلعى جانە فيسكالدىق دەرەكتەر وپەراتورىمەن شارت قاجەت. ساتىلعان تاۋاردىڭ كودى كاسسالىق چەككە تۇسەدى، ال ءاربىر بىرلىكتىڭ ساتىلۋى تۋرالى اقپارات تاڭبالاۋ جۇيەسىنە بەرىلەدى. ساتىپ الۋشى تاۋاردى قايتارسا، ساتۋشى ونى قايتا ساتۋعا بولاتىنداي ەتىپ قايتادان اينالىمعا ەنگىزۋى كەرەك.
تاڭبالاۋ ەنگىزىلگەن ساتتە وندىرۋشىلەردە، ساتۋشىلاردا جانە اينالىمنىڭ باسقا دا قاتىسۋشىلارىندا بولعان جەڭىل ونەركاسىپ تاۋارلارى 2028 جىلعى 1 قاڭتاردان كەشىكتىرىلمەي تاڭبالانۋى قاجەت. قاعيدالاردىڭ نەگىزگى ەرەجەلەرى العاش رەسمي جاريالانعاننان كەيىن 60 كۇنتىزبەلىك كۇن وتكەن سوڭ — 2026 جىلعى 14 قاراشادان باستاپ، ال كودتاردى بىرىكتىرۋ جانە تاۋار اينالىمى تۋرالى مالىمەتتەردى بەرۋ قاعيدالارى 2027 جىلعى 1 قازاننان باستاپ قولدانىسقا ەنەدى.
بۇعان دەيىن «كۋرسيۆ» قازاقستاندا سيفرلىق تاڭبالاۋ نە ءۇشىن ەنگىزىلىپ جاتقانىن جازعان بولاتىن.