شىلدەدەگى ىستىق قازاقستاننىڭ بىرنەشە قالاسىندا تەمپەراتۋرا ماكسيمۋمدارىن جاڭارتتى. تۇركىستاندا اۋا +47،6 گرادۋسقا دەيىن قىزدى، دەپ حابارلايدى infohub.kz.
«قازگيدرومەت» دەرەكتەرى بويىنشا، شىلدەدە ەلدىڭ باسىم بولىگىندە اۋا تەمپەراتۋراسى كليماتتىق نورمادان 1–4 گرادۋسقا جوعارى بولدى. الماتىدا ءبىر اي ىشىندە ءتورت جاڭا ماكسيمۋم تىركەلدى: 16 شىلدەدە تەمپەراتۋرا +38 گرادۋسقا، 17 شىلدەدە +39،2-گە، 18 شىلدەدە +40-قا، ال 20 شىلدەدە +41،5 گرادۋسقا جەتتى.
شىمكەنتتە اۋا +45،2 گرادۋسقا دەيىن قىزدى. مۇندا 1915 جىلعى ەكى تەمپەراتۋرا رەكوردى بىردەن جاڭارتىلدى: 16 شىلدەدەگى كورسەتكىش +41،1-دەن +45،2 گرادۋسقا، ال 17 شىلدەدە +40،1-دەن +45،2 گرادۋسقا كوتەرىلدى.
جوعارى تەمپەراتۋرا باسقا قالالاردا دا بايقالدى. استانادا 14 شىلدەدە تەرمومەتر باعاندارى +38،6 گرادۋسقا، ال وسكەمەندە 16 شىلدەدە +39،7-گە كوتەرىلدى.
قىزىلوردادا 17 شىلدەدە تەمپەراتۋرا +45،2 گرادۋسقا جەتتى. تۇركىستاندا ودان دا جوعارى كورسەتكىش تىركەلدى: 18 شىلدەدە اۋا +47،6 گرادۋسقا دەيىن قىزدى. 2019 جىلى بەلگىلەنگەن الدىڭعى ماكسيمۋم +43،7 گرادۋس بولعان ەدى.
شىلدە تەك ىستىق اكەلگەن جوق. كەيبىر اۋدانداردا جاۋىن-شاشىن مولشەرى كليماتتىق نورمادان ايتارلىقتاي اسىپ ءتۇستى. ماسەلەن، تۇركىستان وبلىسىنداعى جەتىسايدا ءبىر اي ىشىندە كليماتتىق نورمادان 15 ەسە كوپ جاۋىن-شاشىن ءتۇستى.