قازاقستان اۋەجايلارىندا ۇشۋ بيلەتتەرىنىڭ ارتقى جاعىندا جولاۋشىلارعا تەرروريزم اكتىسى تۋرالى كورىنەۋ جالعان حابارلامالار ءۇشىن قىلمىستىق جاۋاپكەرشىلىك، سونداي-اق جەكەلەگەن زاتتاردى تاسىمالداۋعا تىيىم سالۋ تۋرالى ەسكە سالاتىن پروفيلاكتيكالىق ماتەريالدار ورنالاستىرىلا باستادى، دەپ حابارلايدى infohub.kz سايتى.
باس كولىك پروكۋراتۋراسىنىڭ مالىمەتىنشە، ەندى ۇشۋ بيلەتىن العان جولاۋشىلار بومبا تۋرالى ويلانباي ايتىلعان «ءازىلدىڭ» ءوزى قىلمىستىق جاۋاپكەرشىلىككە اكەپ سوعۋى مۇمكىن ەكەندىگى تۋرالى قوسىمشا حاباردار ەتىلەدى. سونداي-اق ەسكەرتپەدە تاسىمالداۋعا تىيىم سالىنعان زاتتار، ونىڭ ىشىندە كاستەتتەر، اتىس قارۋى، وق-دارىلەر جانە باسقا دا ءقاۋىپتى بۇيىمدار تۋرالى اقپارات بار.
قازىرگى ۋاقىتتا مۇنداي تاجىريبە استانا، الماتى، تۇركىستان جانە قاراعاندى حالىقارالىق اۋەجايلارىندا ەنگىزىلگەن. جاقىن ارادا پروفيلاكتيكالىق ماتەريالداردى ەلىمىزدىڭ باسقا دا اۋەجايلارىندا ورنالاستىرۋ جوسپارلانۋدا.