قازاقستاندا جىلۋ ەنەرگياسىن ەسەپكە الۋ قۇرالى جوق تۇتىنۋشىلار ءۇشىن جىلۋ قۇنىن قايتا ەسەپتەۋ اياقتالدى. 2025-2026 جىلعى جىلىتۋ ماۋسىمىنىڭ قورىتىندىسى بويىنشا جالپى سوما قوسىلعان قۇن سالىعىن ەسكەرگەندە 1،217 ملرد تەڭگەنى قۇرادى. بۇل تۋرالى ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ كوميتەتى حابارلادى، دەپ جازادى infohub.kz سايتى.
قايتا ەسەپتەۋ كوشەدەگى ناقتى اۋا تەمپەراتۋراسىن ەسكەرە وتىرىپ جۇرگىزىلەدى. اقشا تۇتىنۋشىلارعا قولما-قول تولەنبەيدى: ءتيىستى سوما جەكە شوتتا اۆانس نەمەسە سالدو رەتىندە بولەك جولمەن كورسەتىلەدى.
ەڭ ۇلكەن سوما استاناعا تيەسىلى – 460،67 ملن تەڭگە. بۇل ەل بويىنشا جالپى قايتا ەسەپتەۋدىڭ شامامەن 38%-ى.
ەكىنشى ورىندا شىعىس قازاقستان وبلىسى – 298،56 ملن تەڭگە، ءۇشىنشى ورىندا ماڭعىستاۋ وبلىسى – 161،6 ملن تەڭگە.
الماتىدا سوما 57،77 ملن تەڭگەگە جەتتى، قىزىلوردا وبلىسىندا – 42،21 ملن، شىمكەنتتە – 38،5 ملن، پاۆلودار وبلىسىندا – 29،11 ملن، جامبىل وبلىسىندا – 26،06 ملن، قوستاناي وبلىسىندا – 25،69 ملن تەڭگە.
اتىراۋ وبلىسىندا 22،09 ملن تەڭگە، سولتۇستىك قازاقستان وبلىسىندا – 14،59 ملن، اقمولا وبلىسىندا – 13،98 ملن، الماتى وبلىسىندا – 12،7 ملن، اقتوبە وبلىسىندا – 11،03 ملن تەڭگە قايتا ەسەپتەلدى.
ەڭ از سومالار باتىس قازاقستان وبلىسىندا – 1،82 ملن تەڭگە، تۇركىستان وبلىسىندا – 370 مىڭ جانە اباي وبلىسىندا – 270 مىڭ تەڭگە بولىپ تىركەلدى.
اتالعان وڭىرلىك كورسەتكىشتەردىڭ بارلىعى قوسىندىسى كوميتەت مالىمدەگەن 1،217 ملرد تەڭگەنى بەرەدى.
قاراعاندى وبلىسى، سونداي-اق ۇلىتاۋ جانە جەتىسۋ وبلىستارى ءۇشىن جەكە قايتا ەسەپتەۋ قاراستىرىلماعان.
بۇل وڭىرلەردە جىلۋمەن جابدىقتاۋ قۇنى سىرتتاعى اۋانىڭ ناقتى تەمپەراتۋراسىن ەسكەرە وتىرىپ ايقىندالعان بولاتىن.
ءبىر جىل بۇرىن قايتا ەسەپتەۋ ايتارلىقتاي كوپ ەدى. 2024-2025 جىلعى جىلىتۋ كەزەڭىنىڭ قورىتىندىسى بويىنشا جىلۋ ەسەپتەگىشى جوق تۇتىنۋشىلارعا شامامەن 1،555 ملرد تەڭگە قايتا ەسەپتەلگەن. وسىلايشا، اعىمداعى ماۋسىمدا سوما شامامەن 337،7 ملن تەڭگەگە، ياعني 21،7%-عا ازايدى. بۇل كوميتەت دەرەكتەرىنە نەگىزدەلگەن ەسەپ.
اياز جاقىن: استانادا جىلۋ قاشان مەرزىمىنەن بۇرىن قوسىلۋى مۇمكىن.