جامبىل وبلىسىندا بالا كەزىنەن مۇگەدەك ەر ادام اناسى قايتىس بولعاننان 34 جىل وتكەن سوڭ اسىراۋشىسىنان ايىرىلۋ بويىنشا جاردەماقى تولەۋدەن باس تارتۋعا قاتىستى سوتقا جۇگىندى. داۋ مەدياسيا كومەگىمەن بەيبىت جولمەن شەشىلدى، دەپ حابارلايدى infohub.kz سايتى.
جامبىل وبلىسى سوتتارىنىڭ رەسمي Telegram-ارناسىندا حابارلانعانداي، بالا كەزىنەن مۇگەدەك ەر ادام حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ دەپارتامەنتىنە تالاپ ارىزبەن جۇگىنگەن. تالاپكەردىڭ اناسى 1992 جىلى، ول كامەلەتكە تولماعان كەزدە قايتىس بولعان. ول اناسىمەن بىرگە تۇرىپ، تولىق اسىراۋىندا بولعان. 1994 جىلى وعان بالا كەزىنەن III توپ مۇگەدەكتىگى رەسمي تۇردە بەلگىلەنگەن.
تالاپكەر دەپارتامەنتكە اسىراۋشىسىنان ايىرىلۋ بويىنشا جاردەماقى تاعايىنداۋ تۋرالى وتىنىشپەن جۇگىنگەن، ءبىراق باس تارتىلعان. باس تارتۋدىڭ نەگىزدەرىنىڭ ءبىرى – اناسى قايتىس بولعان كەزدە ونىڭ اسىراۋىندا بولعانىن قۇجاتتىق راستاۋدىڭ بولماۋى، سونداي-اق مۇگەدەكتىكتىڭ كەيىنىرەك رەسمي تۇردە بەلگىلەنۋى.
باس تارتۋمەن كەلىسپەگەن تالاپكەر سوتقا جۇگىنىپ، ول كامەلەتكە تولماعاندىقتان ءوزىن ءوزى قامتاماسىز ەتە الماعانىن، ال مۇگەدەكتىكتىڭ بالا كەزىنەن بەلگىلەنگەنىن كورسەتكەن.
سوتتا تاتۋلاسۋ راسىمدەرىن قولدانۋ ناتيجەسىندە تاراپتار داۋدى بەيبىت جولمەن رەتتەۋگە شەشىم قابىلداپ، مەدياتيۆتىك كەلىسىم جاساستى. كەلىسىم شارتتارى بويىنشا تالاپكەر جاردەماقى تاعايىنداۋ تۋرالى وتىنىشپەن دەپارتامەنتكە قايتا جۇگىنۋگە مىندەتتەندى. ءوز كەزەگىندە ۆەدومستۆو ءوتىنىشتى ءتيىستى تۇردە قاراپ، ول بويىنشا وڭتايلى شەشىم قابىلداۋعا مىندەتتەندى.
كەلىسىم سوتپەن بەكىتىلىپ، تالاپكەرگە تولەنگەن مەملەكەتتىك باج قايتارىلدى. سوت ۇيعارىمى زاڭدى كۇشىنە ەندى.