ون جىل بۇرىن قازاقستاندا شىعارىلعان بروندى دوڭگەلەكتى ماشينالار بۇكىل پايدالانۋ كەزەڭىندە ەشقانداي كۇردەلى اقاۋسىز جۇمىس ىستەگەنىن infohub.kz سايتى حابارلايدى.
بۇل اقپارات پرەمەر-مينيستردىڭ ءبىرىنشى ورىنباسارى نۇرلىبەك ناليباەۆتىڭ Barys Dynamics كومپانيالار توبىنا كىرەتىن Kazakhstan Paramount Engineering كاسىپورنىنا بارعان قورىتىندىسى بويىنشا جاريالاندى.
كومپانيالار توبىنىڭ باسشىسى ايبەك بارىس حولدينگ كاسىپورىندارىنىڭ قورعانىس ونىمدەرىن ازىرلەۋ مەن ءوندىرۋدىڭ تولىق سيكلىن قامتاماسىز ەتەتىن قىزمەت ناتيجەلەرىن تانىستىردى. حولدينگ قۇرامىنا: Kazakhstan Paramount Engineering (بروندى تەحنيكا)، WSE (ەلەكتروندى-وپتيكالىق جۇيەلەر، راديولوكاسيالىق ستانسيالار جانە بايلانىس قۇرالدارى)، WireTech (ەلەكترونيكا جانە ەلەكتر جۇيەلەرى)، سونداي-اق Barys Dynamics School ينجەنەرلىك مەكتەبى كىرەدى. سونىمەن قاتار، حولدينگ XCMG كومپانياسىمەن بىرلەسىپ جۇك كولىكتەرى مەن ارنايى تەحنيكا زاۋىتىن سالۋ بويىنشا Barys Truck Manufactury ستراتەگيالىق جوباسىن جانە قازاقستاندا جوعارى ەنەرگيالى ماتەريالدار ءوندىرۋ بويىنشا ASPAN Great Sky جوباسىن جۇزەگە اسىرۋدا.
«نۇرلىبەك ناليبايەۆ زاماناۋي بروندى دوڭگەلەكتى ماشينالاردى دايىنداۋدىڭ تولىق وندىرىستىك سيكلىمەن تانىستى: مەتالدى وڭدەۋدەن جانە برونكاپسۋلالاردى جاساۋدان باستاپ، سوڭعى قۇراستىرۋ مەن سىناقتاردى جۇرگىزۋگە دەيىن. كاسىپورىن Arlan جانە Alan-2 ماشينالارىن، Barys ببم وتباسىن (4×4، 6×6، 8×8)، سونداي-اق Terrex–Barys-A 8×8 پەرسپەكتيۆالىق پلاتفورماسىن شىعارادى... ءونىمنىڭ سەنىمدىلىگىنە ەرەكشە نازار اۋدارىلدى، ول سەرتيفيكاتتاۋ سىناقتارىمەن، اسكەردە پايدالانۋمەن جانە بۇۇ-نىڭ گولان بيىكتىگىندەگى بىتىمگەرشىلىك ميسسياسىنا قاتىسۋمەن راستالعان؛ سونىمەن قاتار، 10 جىل پايدالانۋ بارىسىندا ەشقانداي كۇردەلى ىستەن شىعۋ مەن اقاۋلار تىركەلمەگەنىن اتاپ وتكەن ءجون»، — دەلىنگەن حابارلامادا.
زاۋىتتىڭ قازىرگى قۋاتى جىلىنا 500 بىرلىككە دەيىن تەحنيكا شىعارۋعا مۇمكىندىك بەرەدى؛ بۇگىنگى كۇنى 400-دەن استام ماشينا ءوندىرىلدى، ال 2028 جىلعا دەيىنگى تاپسىرىس پورتفەلى 224 بىرلىكتى قۇرايدى. كاسىپورىندا مەنشىكتى كونسترۋكتورلىق بيۋرو قۇرىلىپ، شەتەلدە 100-دەن استام قازاقستاندىق ينجەنەر دايارلاندى — بۇل رەسپۋبليكاعا بروندى تەحنيكانى جوبالاۋ سالاسىندا قاجەتتى قۇزىرەتتەردى قامتاماسىز ەتۋگە مۇمكىندىك بەردى.
سونداي-اق نۇرلىبەك ناليباەۆقا روبوتتاندىرىلعان پلاتفورمالار، بايلانىس قۇرالدارى جانە راديولوكاسيالىق ستانسيالار سالاسىنداعى لوكاليزاسيا دەڭگەيى 70%-دان اساتىن پەرسپەكتيۆالىق ازىرلەمەلەر، قورعانىس-ونەركاسىپ كەشەنى ءۇشىن ارنايى ەلەكترونيكا شىعارۋ جوبالارى، سونداي-اق ينجەنەرلىك-بىلىم بەرۋ ورتالىعىنىڭ قىزمەتى تانىستىرىلدى. كەزدەسۋ قورىتىندىسى بويىنشا ۆيسە-پرەمەر وتاندىق قورعانىس-ونەركاسىپ كەشەنىن دامىتۋدىڭ، ءوندىرىستى ودان ءارى لوكاليزاسيالاۋدىڭ، وزىق تەحنولوگيالاردى ەنگىزۋدىڭ جانە قازاقستاننىڭ ينجەنەرلىك الەۋەتىن نىعايتۋدىڭ ستراتەگيالىق ماڭىزدىلىعىن اتاپ ءوتتى.