قازاقستاندىق ياسمينا يسلاموۆا مەن الديار رامازانوۆ بۋداپەشتە ءوتىپ جاتقان ارتيستيكالىق جۇزۋدەن جاسوسپىرىمدەر اراسىنداعى الەم چەمپيوناتىندا كۇمىس جۇلدەگەر اتاندى. ارالاس دۋەتتەر باعدارلاماسىندا ولار ەكىنشى ورىنعا يە بولدى، دەپ حابارلايدى infohub.kz.
فينالدا قازاقستاندىقتار 248،1 ۇپاي جيناپ، تەك يسپاندىق ارلەت ارنان سانتاكرۋس پەن ەنەكو سانچەس اگيلاردان عانا قالىس قالدى. ولار 263،3 ۇپايمەن التىن الدى. قولا جۇلدەنى جاپوندىق حەيدزو ايتاكا مەن مانامي دودو يەلەندى — 246،9 ۇپاي.
يسلاموۆا مەن رامازانوۆ ءۇشىن بۇل تۋرنيردەگى ەكىنشى ونەر كورسەتۋ بولدى. ءبىر كۇن بۇرىن دۋەت تەحنيكالىق باعدارلامادا 208،4 ۇپايمەن بەسىنشى ورىنعا تۇراقتاعان ەدى. بۇل سىندا رەسەيلىكتەر الينا رۋميانسەۆا مەن زاحار تروفيموۆ (234،1 ۇپاي) جەڭىسكە جەتتى، ەكىنشى ورىندا يسپاندىقتار مارتينا گارسيا مەن ەنەكو سانچەس اگيلار (221،7)، ءۇشىنشى ورىندا قىتايلىقتار چەن كەيۋي مەن سزين يانسياو (217،5) تۇردى.
ارالاس دۋەتتىڭ كۇمىسى قازاقستان قۇراماسىنىڭ چەمپيوناتتاعى ەكىنشى جۇلدەسى بولدى. بۇعان دەيىن ۆيكتور درۋزين ەرلەر اراسىنداعى جەكە تەحنيكالىق باعدارلامادا قولا جۇلدەگەر اتانعان.
جاسوسپىرىمدەر اراسىنداعى الەم چەمپيوناتى (U19) بۋداپەشتە 12-16 تامىز ارالىعىندا وتۋدە. جارىسقا 35 ەلدەن 300 سپورتشى قاتىسىپ، 11 مەدال جيىنتىعىن ساراپقا سالۋدا. قازاقستان اتىنان 12 سپورتشى سىنعا تۇسۋدە.