قازاقستاندىق ماماندار دۋشانبەدەگى ارىپتەستەرىمەن تاجىريبە ءبولىسىپ، ەكى كۇن ىشىندە كۇردەلى وتالار جاساپ، جۇزدەن استام كونسۋلتاسيا وتكىزدى، دەپ حابارلايدى infohub.kz سايتى.
ساپار اياسىندا قازاقستاندىق دارىگەرلەر ۇلتتىق تراۆماتولوگيا جانە ورتوپەديا عىلىمي ورتالىعىنىڭ ماماندارى تاجىكستانداعى ناۋقاستاردى ەمدەۋدە زاماناۋي از ءينۆازيۆتى ادىستەردى قولداندى. جۇمىس بىرنەشە باعىتتا جۇرگىزىلدى: ومىرتقا حيرۋرگياسى، اياق پەن توبىق بۋىنىنىڭ ورتوپەدياسى، سونداي-اق ارتروسكوپيا.
ەڭ كۇردەلىسى ومىرتقاعا جاسالعان وتالار بولدى. ءبولىم مەڭگەرۋشىلەرى مۇرات بايداربەكوۆ پەن سەيدالى ابدالييەۆ بەل ومىرتقاسىنىڭ دەگەنەراتيۆتى ستەنوزى، ايقىن تۇبىرشىك اۋىرسىنۋ سيندرومى بار ناۋقاس ايەلگە وتا جاسادى. حيرۋرگتار ەكى دەڭگەيدە (L4-L5 جانە L5-S1) جۇيكە قۇرىلىمدارىنا دەكومپرەسسيا جاساپ، ترانسپەديكۋليارلىق جۇيە مەن دەنەارالىق كەيدجدەر ورناتتى.
تاعى ءبىر وتا سكوليوزى بار 13 جاستاعى ناۋقاس قىزعا جاسالىپ، وعان ومىرتقانىڭ كۇردەلى دەفورماسياسى تۇزەتىلدى.
اياق جانە تىزە بۋىنى حيرۋرگياسى سالاسىندا №2 ورتوپەديالىق ءبولىمنىڭ مەڭگەرۋشىسى قايرات تاجين توبىق بۋىنىنىڭ III دارەجەلى پوستتراۆماتيكالىق ارتروزى جانە ايقىن اياق دەفورماسياسى بار 24 جاستاعى ناۋقاسقا وتا جاسادى. جاس جىگىتكە دەفورماسيانى تۇزەتۋ جانە اياقتى تۇراقتاندىرۋ ءۇشىن ءۇش بۋىندى ارترودەز جاسالدى.
تاعى ءبىر ناۋقاس ايەلگە توبىق بۋىنىنىڭ تۇراقسىزدىعىنا بايلانىستى ۋوتسون بويىنشا پلاستيكا جاسالدى. از ءينۆازيۆتى ارالاسۋدى ارتروسكوپيا جانە سپورتتىق جاراقات ءبولىمىنىڭ مەڭگەرۋشىسى نۇرجان اسانوۆ ورىندادى. ول سونداي-اق تىزە بۋىنىنا ەكى ارتروسكوپيالىق وتا جاسادى: مەديالدى مەنيسك تىگىسى جانە كاپسۋلا-بايلام اپپاراتىنىڭ پلاستيكاسى.
«تاجىكستانداعى ەكى كۇندىك جۇمىس بارىسىندا قازاقستاندىق ماماندار جۇزدەن استام كونسۋلتاسيا وتكىزىپ، ون شاقتى حيرۋرگيالىق وتا جاسادى»، — دەلىنگەن دەنساۋلىق ساقتاۋ مينيسترلىگىنىڭ حابارلاماسىندا.