7 قىركۇيەكتەن باستاپ قازاقستاندا زەينەتاقى جيناعىن باسقارۋدىڭ جاڭا ەرەجەلەرى كۇشىنە ەندى. ەندى ازاماتتار زەينەتاقى قاراجاتىنىڭ 100 پايىزىن جەكە باسقارۋشى كومپانيالارعا بەرە الادى، دەپ حابارلايدى infohub.kz سايتى.
بۇعان دەيىن قازاقستاندىقتار جەكە كومپانيالارعا جيناعىنىڭ جارتىسىن عانا سەنىپ تاپسىرا الاتىن، ەندى بۇل شەكتەۋ الىنىپ تاستالدى. قاراجاتتى قاي باسقارۋشى كومپانياعا تاپسىرۋ تۋرالى شەشىمدى ءار سالىمشى ءوزى قابىلدايدى، ول ءۇشىن كىرىستىلىك كورسەتكىشتەرى مەن باسقا دا كريتەريلەردى ەسكەرەدى.
تاعى ءبىر ماڭىزدى جاڭالىق – باسقارۋشى كومپانيالاردىڭ ءارتۇرلى ينۆەستيسيالىق ستراتەگيالاردى ۇسىنۋ قۇقىعى: كونسەرۆاتيۆتى، ورتاشا جانە تاۋەكەلدى. ءبىرىڭعاي جيناقتاۋشى زەينەتاقى قورىندا (بجزق) تۇسىندىرگەندەي، كونسەرۆاتيۆتى پورتفەل بارلىق سالىمشىعا قولجەتىمدى، ونىڭ كىرىستىلىگى 12 اي ىشىندە باعالانادى. ورتاشا ستراتەگيانى زەينەتكە دەيىن ءۇش جىلدان استام ۋاقىتى قالعاندار تاڭداي الادى، ناتيجەلەر 36 اي ىشىندە باعالانادى. تاۋەكەلدى پورتفەل تەك زەينەتكە شىعۋعا 13 جىلدان استام ۋاقىتى بارلارعا عانا قولجەتىمدى، ونىڭ تيىمدىلىگى 60 اي ىشىندە باعالانادى.
جاڭا ەرەجەلەر ءارتۇرلى تاۋەكەل دەڭگەيىندەگى زەينەتاقى پورتفەلدەرىن قالىپتاستىرۋعا مۇمكىندىك بەرۋگە ارنالعان. الايدا ءىس جۇزىندە جۇيە ازىرگە ويلاستىرىلعانداي جۇمىس ىستەمەي تۇر. ءقازىر سالىمشىلار ناقتى ءبىر باسقارۋشى كومپانيا ىشىندە ستراتەگيانى وزدىگىنەن تاڭداي المايدى. بجزق دەرەكتەرىنە سايكەس، قازىرگى كومپانيالاردىڭ ءارقايسىسى تەك ءبىر تيپتەگى پورتفەلدى ۇسىنادى: BCC Invest – كونسەرۆاتيۆتى، Alatau City Invest – ورتاشا، Halyk Finance – كونسەرۆاتيۆتى، Halyk Global Market – كونسەرۆاتيۆتى، Tansar Capital – ورتاشا، «سەنتراس سەكيۋريتيز» – كونسەرۆاتيۆتى.
بولاشاقتا ستراتەگيا تاڭداۋ اياسى كەڭەيۋى مۇمكىن، ءبىراق ازىرگە باسقارۋشىلار ءبىر ناقتى سحەما بويىنشا جۇمىس ىستەيدى. دەگەنمەن قازاقستاندىقتار باسقارۋشىلاردىڭ جۇمىس ناتيجەلەرىن وزدەرى باعالاپ، قاراجات اۋدارۋ تۋرالى شەشىم قابىلداي الادى. بارلىق جيناقتى ءبىر كومپانياعا بەرۋ مىندەتتى ەمەس – ولاردى بىرنەشە كومپانياعا بولۋگە بولادى. سونداي-اق اكتيۆتەردى ۇلتتىق بانك باسقارۋىنا قايتارۋ مۇمكىندىگى ساقتالادى.
بۇعان دەيىن قازاقستاندىقتاردى جەكە كومپانيالار ءوز قىزمەتتەرى ءۇشىن كوميسسيا ۇستاي الاتىنىن ەسكەرتكەن بولاتىن، بۇل دا شەشىم قابىلداۋ كەزىندە ەسكەرىلۋى ءتيىس.