قازاق ۇلتتىق سپورت ۋنيۆەرسيتەتىنىڭ (قۇسۋ) قۇراماسى الماتىدا ءوتىپ جاتقان جوو اراسىنداعى شاحماتتان كوماندالىق الەم چەمپيوناتىنىڭ جارتىلاي فينالىنا جولداما الدى. شيرەك فينالدا قازاقستاندىقتار افينا ۇلتتىق تەحنيكالىق ۋنيۆەرسيتەتىنىڭ كومانداسىن جەڭدى، دەپ حابارلايدى infohub.kz.
شيرەك فينالدىڭ ءبىرىنشى تۋرى 2:2 ەسەبىمەن تەڭ اياقتالدى، بۇل ءبىزدىڭ شاحماتشىلاردى بارىنشا جيناقتالۋعا ءماجبۇر ەتتى. ەكىنشى تۋردا اق تۇسپەن حالىقارالىق شەبەر مەرۋەرت كاماليدەنوۆا سەنىمدى جەڭىسكە جەتتى. ساتبەك احمەدينوۆ ءبىرىنشى پارتياداعى جەڭىلىسى ءۇشىن رەۆانش الدى. ارىستان يسانجۋلوۆ پەن قازىبەك نوگەربەك ءوز پارتيالارىن تەڭ اياقتادى.
ماچتىڭ جالپى ەسەبى قۇسۋ پايداسىنا 5:3 بولىپ، كوماندا جارتىلاي فينالعا شىقتى. ەرتەڭ ولار ءتۋرنيردىڭ فاۆوريتتەرى — ەكاتەرينبۋرگتەن كەلگەن ورال تاۋ-كەن ۋنيۆەرسيتەتىنىڭ كومانداسىمەن كەزدەسەدى. بۇل كوماندا شيرەك فينالدا چيليلىكتەرگە نەبارى جارتى ۇپاي جىبەرىپ العان.
ەكىنشى جارتىلاي فينال تازا امەريكاندىق بولادى: فينالعا شىعۋ ءۇشىن سەنت-لۋيس ۋنيۆەرسيتەتى مەن گارۆارد ۋنيۆەرسيتەتى سىنعا تۇسەدى. قازاقستاندىقتار وسى كوماندالاردىڭ بىرىمەن جەكسەنبىدە وينايدى — نە التىن ءۇشىن، نە قولا ءۇشىن.
جارتىلاي فينالدار، ءۇشىنشى ورىن ءۇشىن ماچ جانە فينال، توپتىق كەزەڭ ويىندارى سياقتى، ەكى راۋندتان وتەدى. تەڭ بولعان جاعدايدا جەڭىمپازدى تاي-برەيك انىقتايدى. ماچتار ءتورت تاقتادا وتەدى، ءار كوماندادا مىندەتتى تۇردە كەمىندە ءبىر ەر جانە كەمىندە ءبىر ايەل بولۋى ءتيىس. ۋاقىت باقىلاۋى — 45 مينۋت پليۋس ءار جۇرىسكە 30 سەكۋند، ءبىرىنشى جۇرىستەن باستاپ.
ءتۋرنيردى فيدە قازاقستان رەسپۋبليكاسىنىڭ تۋريزم جانە سپورت مينيسترلىگىمەن، قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگىمەن، قازاقستان شاحمات فەدەراسياسىمەن جانە الماتى قالاسىنىڭ اكىمدىگىمەن بىرلەسىپ ۇيىمداستىرۋدا. باس سەرىكتەستەر — Freedom كومپانيالار توبى جانە «شاپاعات» كورپوراتيۆتىك قورى.
جارىستىڭ جالپى جۇلدە قورى 50 مىڭ ەۋرونى قۇرايدى. چەمپيوندار 25 مىڭ ەۋرو، ۆيسە-چەمپيوندار 15 مىڭ ەۋرو الادى، ال ءۇشىنشى ورىن العان كوماندا 10 مىڭ ەۋرونى بولىسەدى.