2026 جىلى قازاقستاندا شامامەن 23 ميلليون توننا استىق جينالادى دەپ كۇتىلۋدە. بۇل كورسەتكىش بىلتىرعى رەكوردتىق دەڭگەيدەن تومەن بولعانىمەن، كوپجىلدىق ورتاشا كولەمنەن جوعارى بولادى. بۇل تۋرالى اۋىل شارۋاشىلىعى مينيسترلىگى حابارلادى، دەپ جازادى infohub.kz سايتى.
اۋىل شارۋاشىلىعى ۆيسە-مينيسترى نازگۇل حاتەپوۆانىڭ ناقتىلاۋىنشا، ەل ورتا ەسەپپەن جىل سايىن 18–19 ميلليون توننا شاماسىندا استىق جينايتىن. بيىلعى ماۋسىمدا ناتيجە ودان جوعارى بولادى دەپ كۇتىلۋدە.
«بيىلعى جىلى كوپجىلدىق ورتاشا كولەمنەن جوعارى بولادى دەپ بولجاپ وتىرمىز. سوڭعى 10، 5، 15 جىلداعى ورتاشا ءونىمدى الساق، ورتا ەسەپپەن 18–19 ميلليون توننا استىق جيناعانىمىزدى كورەمىز. بيىلعى كولەم ودان جوعارى بولادى دەپ جوسپارلاپ وتىرمىز، ارينە، بۇل كولەم بىلتىرعىدان تومەن»، — دەدى زاممينيسترا ۇكىمەتتەگى بريفينگتە.
قازىرگى تاڭدا ديقاندار شامامەن 20 ميلليون توننا استىق جيناپ قويدى. ەگىن جيناۋ ناۋقانى شامامەن 83%-عا ورىندالدى.
اۋىل شارۋاشىلىعى مينيسترلىگىندە جيناۋ اياقتالعان سوڭ جالپى ءونىم 23 ميلليون تونناعا جەتەدى دەپ كۇتىپ وتىر.
«وتكەن ەكى جىل رەكوردتى بولدى — باستاپقى سالماقتا 27،5 ميلليون توننا. جالپى، بۇگىندە 20 ميلليون توننا شاماسىندا جينادىق، بۇل 83 پايىز، بيىل شامامەن 23 ميلليون توننا استىق جينايمىز دەپ جوسپارلاپ وتىرمىز»، — دەپ قوستى حاتەپوۆا.
سونىمەن قاتار «قازگيدرومەت» قازاقستاننىڭ نەگىزگى استىق وسىرەتىن ايماقتارىندا ەگىن جيناۋ كەزەڭىندە اۋا رايى قيىن بولاتىنىن ەسكەرتتى.
بۇعان دەيىن «كۋرسيۆ» قازاقستاندا سيىر ەتىنىڭ باعاسى نە بولاتىنىن جازعان ەدى.