2024 جىلعى 26 قىركۇيەكتەن باستاپ قازاقستاندا جەكە تۇلعالاردىڭ باسقا ەلدەردەن اۆتوموبيل اكەلۋىنە قاتىستى جاڭارتىلعان ەرەجەلەر كۇشىنە ەندى. وزگەرىستەر راسىمدەلەتىن قۇجاتتار سانىنا، كولىك جاسىنا جانە ءبىرقاتار تەحنيكالىق تالاپتارعا قاتىستى بولدى، دەپ حابارلايدى infohub.kz سايتى.
جاڭا نورمالارعا سايكەس، جەكە تۇلعا كولىك قۇرالىنىڭ قاۋىپسىزدىگى تۋرالى كۋالىكتى (كققس) ءبىر كۇنتىزبەلىك جىل ىشىندە ءبىر رەت قانا الا الادى. بۇل شەكتەۋ ءۇشىنشى ەلدەردەن جەكە پايدالانۋ ءۇشىن اكەلىنەتىن جەڭىل اۆتوموبيلدەرگە، شاعىن اۆتوبۋستارعا جانە جەڭىل جۇك كولىكتەرىنە قاتىستى.
سونىمەن قاتار، اۆتوموبيلمەن بىرگە جالپى سالماعى 3،5 تونناعا دەيىنگى ءبىر تىركەمە، سونداي-اق تۇرۋعا نەمەسە اۆتوتۋريزمگە ارنالعان «ۇي-تىركەمە» تۇرىندەگى تىركەمە اكەلۋگە رۇقسات ەتىلەدى. اۆتوموبيل تاسىمالداۋعا ارنالعان تىركەمە بۇل ەرەجەدەن تىس قالادى.
2024 جىلى قازاقستاندا اۆتوموبيل اكەلۋ مۇمكىندىكتەرىن شەكتەيتىن تۇزەتۋلەر قابىلدانعان بولاتىن. جەكە تۇلعالار اۆتونى تەك كققس بويىنشا، جەكە پايدالانۋعا ارنالعان كەدەندىك مولشەرلەمەمەن 48%-دان نەمەسە تەكشە سانتيمەترىنە 1،5 ەۋرودان باستاپ بىرلەسكەن تولەم تۇرىندە اكەلە الاتىن. زاڭدى تۇلعالارعا «كولىك قۇرالى ءتۇرىن ماقۇلداۋ» (كقتم) قۇجاتى تالاپ ەتىلدى. بۇل شارالار سۇر يمپورتقا قارسى كۇرەسكە باعىتتالعان.
دەرەككوزدە اتاپ وتىلگەندەي، قىركۇيەك سوڭىندا شەكتەۋ باسقا دا نورماتيۆتىك-قۇقىقتىق اكتىدە قوسىمشا جازىلىپ، ودان دا قاتاڭ تالاپتارمەن تولىقتىرىلدى. «2024 جىلعى 26 قىركۇيەكتەن باستاپ قازاقستاندا كولىك قۇرالىنىڭ قاۋىپسىزدىگى تۋرالى كۋالىكتەردى (كققس) راسىمدەۋ ەرەجەلەرىنە وزگەرىستەر كۇشىنە ەندى. ساۋدا مينيسترلىگى جاريالاعان قۇجاتقا سايكەس، ەندى جەكە تۇلعا ءۇشىنشى ەلدەردەن جەكە پايدالانۋ ءۇشىن اكەلەتىن جەڭىل اۆتو، شاعىن اۆتوبۋس نەمەسە جەڭىل جۇك كولىگىنە كققس ءبىر كۇنتىزبەلىك جىل ىشىندە ءبىر رەتتەن ارتىق بەرىلمەيدى»، — دەلىنگەن دەرەككوزدە.
جاڭا ەرەجەلەر كققس راسىمدەۋگە تىيىم سالىنعان اۆتوموبيلدەر ءتىزىمىن دە بەلگىلەيدى. وعان جەكە پايدالانۋعا اكەلىنبەگەن (جولاۋشىلار كەدەندىك دەكلاراسياسى بويىنشا ەمەس) كولىكتەر؛ رۇقسات ەتىلگەن پارامەترلەرگە ساي كەلمەيتىن كولىك قۇرالدارى (ەۋرو-4 ستاندارتى، ول ەۋرو-5-كە اۋىستىرىلۋى مۇمكىن)؛ ەاەو ەلدەرىنەن جەكە تۇلعا اكەلەتىن 5 جىلدان اسقان اۆتوموبيلدەر (مۇنداي كولىكتەرگە ەلەكتروندىق پاسپورتتار راسىمدەلمەيدى)؛ سونداي-اق باسقارۋ ورگاندارى وڭ جاقتان سول جاققا قايتا جابدىقتالعان كولىك قۇرالدارى كىرەدى.
وسىلايشا، وسى ولشەمشارتتارعا ساي كەلەتىن اۆتوموبيلدەردى جەكە تۇلعالار قازاقستانعا اكەلە المايدى.
بۇعان قوسا، جاڭارتىلعان ەرەجەلەر راسىمدەۋ ءتارتىبىن قاتاڭداتادى. «جاڭارتىلعان ەرەجەلەرمەن كققس راسىمدەۋ كەزىندە شاناققا (راماعا) سوعىلعان VIN-كود (Vehicle Identification Number)، ءوندىرۋشىنىڭ سايكەستەندىرۋ تاقتايشاسى، سونداي-اق ماڭدايشا اينەكتىڭ استىنداعى قوسىمشا VIN تاڭبالاۋى (بار بولسا) تىركەلۋى ءتيىس دەپ بەلگىلەنەدى. سىناق زەرتحاناسىندا اۆتونى تەكسەرۋ پروسەسى، ونىڭ ىشىندە SOS تۇيمەسىنىڭ جۇمىس ىستەۋىن تەكسەرۋ ءتورت جاقتان مىندەتتى تۇردە بەينەگە جازىلادى. تەكسەرۋ ماتەريالدارى قاۋىپسىزدىك تۋرالى كۋالىك بەرىلگەن كۇننەن باستاپ كەمىندە 3 جىل ساقتالادى»، — دەپ حابارلايدى Kolesa.kz.
ەسكە سالايىق، بۇعان دەيىن الماتى تۇرعىندارىنا ايىپپۇل تۇراعىنا الىنعان اۆتوموبيلدەردى 4 قازانعا دەيىن الىپ كەتۋگە كەڭەس بەرىلگەن — وسى كۇننەن باستاپ جاڭا تاريفتەر كۇشىنە ەنەدى. سونداي-اق قازاقستاندا اۆتوموبيلدەر ارزانداعانى، قىركۇيەك سوڭىندا اۆتوليزينگ باعدارلامالارىنىڭ مولشەرلەمەلەرى بەكىتىلگەنى حابارلانعان بولاتىن.