قازاقستان بوكس قۇراماسىنىڭ باس باپكەرى ەلدوس سايدالين ۇلتتىق وليمپيادا كوميتەتىنە بەرگەن سۇحباتىندا ازيا ويىندارىنا قاتىساتىن كوماندانىڭ تۇپكىلىكتى قۇرامىن اتادى. ويىندار 19 قىركۇيەك پەن 4 قازان ارالىعىندا جاپونيادا وتەدى، دەپ حابارلايدى infohub.kz سايتى.
ءسايداليننىڭ ايتۋىنشا، ايەلدەر قۇراماسىنا الۋا بالكيبەكوۆا (51 كەلىگە دەيىن)، نازىم قىزايباي (54 كەلىگە دەيىن)، ۆيكتوريا گرافەەۆا (60 كەلىگە دەيىن)، ايدا ابيكەەۆا (65 كەلىگە دەيىن) جانە ناتاليا بوگدانوۆا (75 كەلىگە دەيىن) ەندى.
«قاتىسۋشىلار ءتىزىمىن جاساۋ كەزىندە وتكەن جىلعى الەم چەمپيوناتىنىڭ ناتيجەلەرى، سونداي-اق بيىلعى ماۋسىمداعى الەم كۋبوگى كەزەڭدەرىنىڭ قورىتىندىلارى ەسكەرىلدى»، — دەپ اتاپ ءوتتى باپكەر.
مامان ازيادا ايەلدەر بوكسى قارقىندى دامىپ جاتقانىن، نەگىزگى قارسىلاستار رەتىندە ءۇندىستان مەن جۇڭگو قۇرامالارىن اتادى.
«ءقازىر ءبىزدىڭ كوماندا اقش-تا وقۋ-جاتتىعۋ جيىنىن وتكىزىپ جاتىر. 4 تامىزدا قازاقستانعا قايتامىز. ودان كەيىن سپورتشىلار جەكە باعدارلاما بويىنشا دايىندالىپ، ازداپ دەمالادى. كەلەسى جيىن 16 تامىزدا باستالادى. وعان رەسەي مەن اقش قۇرامالارى قاتىسادى. ال 9 قىركۇيەكتە جاپونياعا اتتانامىز، وندا دايىندىقتىڭ قورىتىندى كەزەڭى وتەدى. بەيىمدەلۋدەن ءوتىپ، ويىندارعا دايىندالامىز»، — دەدى سايدالين.
باپكەردىڭ ايتۋىنشا، قازاقستاندىق سپورتشىلاردىڭ كوڭىل كۇيى جاقسى، جاراقاتتارى جوق. كوماندا ازيا ويىندارىندا ءساتتى ونەر كورسەتۋگە ءۇمىت ارتىپ وتىر.