قازاقستان قۇراماسى ەكۆادوردا وتكەن كادەتتەر اراسىنداعى دزيۋدودان الەم چەمپيوناتىندا جەكە سىندا رەكوردتىق ناتيجەمەن اياقتادى: 10 مەدال، ونىڭ ىشىندە ءۇش التىن، ءۇش كۇمىس جانە ءتورت قولا، دەپ حابارلايدى infohub.kz سايتى.
قازاقستان قۇراماسىنا ءۇشىنشى التىندى 90 كەلىدەن جوعارى سالماق دارەجەسىندە ونەر كورسەتكەن ءادىلجان جاۋدينوۆ اكەلدى. فينالدا ول ءابدىلماناف رامازانوۆپەن كەزدەسىپ، قوسىمشا ۋاقىتتا يپپونمەن جەڭىسكە جەتتى. الەمدىك رەيتينگتە ءتورتىنشى ورىندا تۇرعان جاۋدينوۆ تيتۋلعا جولدا جاپوندىق كوگا تەرۋكي، برازيليالىق جوزە پاۋلۋ پەرەيرا جانە فرانسيالىق ازريەل دەكەنن ديففودان باسىم ءتۇستى.
بۇعان دەيىن الەم چەمپيوندارى اتانعاندار: 60 كەلىگە دەيىنگى سالماقتا عابيت راسۋلحان جانە 52 كەلىگە دەيىنگى سالماقتا فاتيما سۋپىگاليەۆا. سۋپىگاليەۆا وسىلايشا قىزدار اراسىنداعى الەم چەمپيوناتىن جەڭىپ العان تۇڭعىش قازاقستاندىق اتاندى.
كۇمىس مەدالداردى ءادىلجان نۇربەكەن (50 كەلىگە دەيىن)، اديا جاناحمەت (40 كەلىگە دەيىن) جانە ينجۋ جۇماجان (57 كەلىگە دەيىن) يەلەندى. قولا جۇلدەگەرلەر: بەكارىس قۇدايبەرگەن (50 كەلىگە دەيىن)، احمەت باۋبەك (60 كەلىگە دەيىن)، ەرىك وسەنوۆ (66 كەلىگە دەيىن) جانە ەركەن بەكالي (73 كەلىگە دەيىن).
ەكۆادورداعى ناتيجە قازاقستان قۇراماسى ءۇشىن رەكوردتىق بولدى: بۇعان دەيىن ۇلتتىق كوماندا ءبىر الەم چەمپيوناتىندا (كادەتەر، يۋنيورلار نەمەسە ەرەسەكتەر اراسىندا) 10 مەدال جانە ءۇش التىن مەدال جەڭىپ الماعان ەدى. سونىمەن قاتار، قازاقستاندىق دزيۋدوشىلار جەكە سىننىڭ ءۇش كۇنىندە دە التىن مەدالعا قول جەتكىزدى.
23 تامىزدا الەم چەمپيوناتى ارالاس كوماندالىق تۋرنيرمەن جالعاسادى. جارىسقا بارلىعى 59 ەلدەن 457 دزيۋدوشى قاتىسۋدا.