قازاقستان پرەزيدەنتى قاسىم-جومارت توقايەۆ مۇرات بايمۇقاشەۆتى رەسپۋبليكا قاۋىپسىزدىك كەڭەسى اپپاراتىنىڭ جەتەكشىسى ەتىپ تاعايىنداۋ تۋرالى جارلىققا قول قويدى، دەپ حابارلايدى infohub.kz سايتى.
اقوردانىڭ رەسمي سايتىندا جاريالانعان مالىمەتكە سايكەس، مۇرات بايمۇقاشيەۆ جاڭا قىزمەتكە تاعايىندالۋىنا بايلانىستى بۇرىن اتقارعان لاۋازىمىنان بوساتىلدى.
مۇرات بايمۇقاشيەۆ 1967 جىلى دۇنيەگە كەلگەن. 1994 جىلى قازاق اۋىل شارۋاشىلىعى ينستيتۋتىن، 1998 جىلى قاراعاندىداعى ۇقك جوعارى مەكتەبىن، ال 2015 جىلى رەسەي حالىق شارۋاشىلىعى جانە مەملەكەتتىك قىزمەت اكادەمياسىن بىتىرگەن.
1994-2009 جىلدارى ول قۇقىق قورعاۋ ورگاندارىندا، ونىڭ ىشىندە ىشكى ىستەر ورگاندارى مەن باس پروكۋراتۋرادا قىزمەت ەتتى. 2009-2019 جىلدارى قازاقستان پرەمەر-مينيسترى كەڭسەسىندە قورعانىس جانە قۇقىق ءتارتىبى ءبولىمىنىڭ مەڭگەرۋشىسىنىڭ ورىنباسارى جانە مەڭگەرۋشىسى قىزمەتتەرىن اتقاردى.
2019-2020 جىلدارى رەسپۋبليكا قاۋىپسىزدىك كەڭەسى حاتشىسىنىڭ ورىنباسارى بولدى. 2020-2021 جىلدارى ىشكى ىستەر مينيسترلىگى اكىمشىلىك پوليسيا كوميتەتىن باسقاردى. 2021-2022 جىلدارى ىشكى ىستەر ءمينيسترىنىڭ ورىنباسارى، ال 2022-2023 جىلدارى قاۋىپسىزدىك كەڭەسى حاتشىسىنىڭ ءبىرىنشى ورىنباسارى قىزمەتىن اتقاردى. 2023 جىلدىڭ 1 قىركۇيەگىنەن باستاپ قايتادان قاۋىپسىزدىك كەڭەسى حاتشىسىنىڭ ورىنباسارى بولدى.
مۇرات بايمۇقاشيەۆ «قۇرمەت» (2013) جانە «ايبىن» II دارەجەلى (2020) وردەندەرىمەن ماراپاتتالعان. 2021 جىلى وعان پوليسيا گەنەرال-مايورى ارناۋلى اتاعى بەرىلدى.
بۇعان دەيىن قاسىم-جومارت توقايەۆ قاۋىپسىزدىك كەڭەسىندە ءبىرقاتار تاعايىنداۋلار جاساعانى، ونىڭ ىشىندە بۇرىنعى قورعانىس ءمينيسترى رۋسلان جاقسىلىقوۆ تا لاۋازىم العانى حابارلانعان بولاتىن.