قازاقستان ازاماتتارى قىتايدا ەمتيحان تاپسىرماي-اق كولىك جۇرگىزە الادى، ال قحر ازاماتتارى قازاقستاندا وسى مۇمكىندىككە يە بولادى. ق ر ىشكى ىستەر مينيسترلىگى ەكى ەل اراسىنداعى جۇرگىزۋشى كۋالىكتەرىن ءوزارا تانۋ جانە ايىرباستاۋ تۋرالى كەلىسىم جوباسىن دايىندادى... دەپ حابارلايدى infohub.kz.
نورماتيۆتىك قۇقىقتىق اكتىگە سايكەس، قازاقستان مەن جۇڭگو ازاماتتارى قابىلداۋشى ەلدىڭ اۋماعىندا جەڭىل كولىك قۇرالدارىن باسقارۋ ءۇشىن قولدانىستاعى ۇلتتىق جۇرگىزۋشى كۋالىكتەرىن پايدالانۋ قۇقىعىنا يە بولادى.
نەگىزگى جاڭاشىلدىق — قۇجاتتاردى تىكەلەي ايىرباستاۋ مۇمكىندىگى. ۋاقىتشا نەمەسە تۇراقتى تۇردە سەرىكتەس مەملەكەت اۋماعىندا جۇرگەن ەكى ەل ازاماتتارى قايتا وقۋدان وتپەي-اق جانە بىلىكتىلىك ەمتيحاندارىن تاپسىرماي-اق جۇرگىزۋشى كۋالىكتەرىن ايىرباستاي الادى. بۇل ءراسىم قابىلداۋشى تاراپتىڭ ىشكى زاڭناماسىنىڭ تالاپتارىن ساقتاي وتىرىپ جۇزەگە اسىرىلادى.
ۇكىمەتارالىق كەلىسىمنىڭ ماقساتى — اكىمشىلىك راسىمدەردى جەڭىلدەتۋ، سونداي-اق قازاقستان رەسپۋبليكاسى مەن جۇڭگو حالىق رەسپۋبليكاسى اراسىنداعى كولىك، تۋريستىك جانە ىسكەرلىك بايلانىستاردى ىنتالاندىرۋ.
جوبانى ىسكە اسىرۋ جانە قۇجاتتارمەن الماسۋ كەلىسىمگە رەسمي قول قويىلعاننان، بارلىق مەملەكەتىشىلىك راسىمدەر اياقتالعاننان جانە قۇجات زاڭدى كۇشىنە ەنگەننەن كەيىن باستالادى.
ەسكە سالايىق، 25 شىلدەدە تاياۋ شىعىس ەلدەرىمەن وسىعان ۇقساس ديپلوماتيالىق كەلىسىمدەر جاسالعانى حابارلانعان بولاتىن. قول قويىلعان قۇجاتتارعا سايكەس، قازاقستاندىقتار بىرىككەن اراب امىرلىكتەرىنىڭ (ءباا) اۋماعىندا قوسىمشا تەوريالىق جانە پراكتيكالىق ەمتيحاندار تاپسىرماي-اق ۇلتتىق جۇرگىزۋشى كۋالىكتەرىن ايىرباستاۋ قۇقىعىنا يە بولدى.