قازاقستان تاۋلارىنان 19 جىل بۇرىن جوعالعان ءالپينيستتىڭ دەنەسى تابىلدى. ەر ادامنىڭ سۇيەگىن 19 تامىزدا سەۆەرسيەۆ مۇزدىعىنان تۇسىرگەن، دەپ حابارلايدى infohub.kz سايتى.
قايتىس بولعان ادامنىڭ ريۋكزاگىن قىزى تانىعان. الماتى تۇرعىنى اناستاسيا احمەتوۆا Facebook-تە دوستارى — بەلارۋس تۋريستەرى — تاۋدان دەنە تاۋىپ العانى تۋرالى اڭگىمەنىڭ جالعاسىن ايتىپ بەردى.
الەۋمەتتىك جەلى قولدانۋشىلارى تابىلعان ەر ادامدى فوتوسۋرەتتەگى جابدىقتارى ارقىلى تانۋعا بولادى دەپ بولجادى. «مۇنداي ريۋكزاكتار 90-جىلداردىڭ سوڭى مەن 2000-جىلداردىڭ باسىندا كەڭ تاراعان — اۋىر مەتالل كاركاسىمەن. بۇل دەنەنىڭ تاۋدا شامامەن 20 جىل جاتقانىن بىلدىرەدى»، — دەپ اتاپ ءوتتى ولار.
كوپ ۇزاماي جاريالانىم اۆتورىنا جوعالعان ءالپينيستتىڭ بولجامدى قىزى نەلليا ميحەەۆا حابارلاستى. «19 جىلدان كەيىن اكەمنىڭ سۇيەگى تابىلدى. تاڭەرتەڭ قۇربىم بىزدىكىنە قاتتى ۇقسايتىن ريۋكزاكتىڭ فوتوسى بار جازبانى جىبەردى. كەيىن سول جازبانى كۇيەۋىم دە جىبەردى. مەن تجم-گە حابارلاستىم، ماعان دەنەنى تۇسىرگەن قۇتقارۋشىنىڭ تەلەفون ءنومىرىن بەردى، تەرگەۋشىنىڭ دە ءنومىرىن بەردى. ول بارلىق فوتوسۋرەتتەر مەن قۇجاتتاردى جىبەرۋدى سۇرادى. كەيىن قايتا قوڭىراۋ شالىپ، ريۋكزاكتان اكەمنىڭ اتىنا جازىلعان كۋالىك تابىلعانىن ايتتى»، — دەدى قىز ستوريسىندە.
ول ەر ادامنىڭ دەنەسىنەن ءوتىپ كەتە الماعان تۋريستەرگە، اقپارات تاراتقان بلوگەرلەر مەن باق-قا، سونداي-اق قۇتقارۋشىلار مەن پوليسيا قىزمەتكەرلەرىنە شىن جۇرەكتەن العىسىن ءبىلدىردى.
بۇعان دەيىن «كۋرسيۆ» تجم تىكۇشاعى قايتىس بولعان ەر ادامنىڭ دەنەسىن 3400 مەتر بيىكتىكتەن تۇسىرگەنىن حابارلاعان بولاتىن، بۇل تۋرالى قۇتقارۋشىلارعا بەلارۋس الپينيستەرى حابارلاعان ەدى.